甜品嘅魔力真係好大，通常食完心情會特別好～曲奇餅香脆鬆軟，好多人行街/上網見到都會忍唔住想食，近年更愈來愈流行美式軟曲奇，口味多外有啲仲識流心，亦都好多網店陸續出現，又有唔少網店變實體店！開飯仔今次又精選咗幾間畀大家，甜品控一定唔會失望。
原創焦糖酥皮曲奇 Cookies Vission
小店位於大坑，係一間由網店做到實體店嘅人氣曲奇。由於創辦人覺得做網店，客人收到嘅曲奇一定唔係最新鮮，咁佢希望客人食到最新鮮出爐嘅曲奇，所以就開設呢間實體店，同時令到更多人試到佢嘅作品！最特別嘅款式一定係Pookie，出面其他地方食唔到㗎。喺曲奇表面加上一層類似牛角酥嘅焦糖酥皮，外酥內軟，味道層次更加豐富，而且每日嘅口味都會有唔同～除咗Pookie當然唔少得經典口味，如Macha macadamia nuts、Key Lime Pie同Apple Pie都好有人氣。
超人氣爆漿美式曲奇 Cookie DPT
平時鍾意食曲奇嘅朋友，應該都對呢間人氣曲奇店唔陌生，店舖除咗網店仲喺尖沙咀同銅鑼灣都有寄賣點。主打外脆內裡濕潤又煙韌嘅美式曲奇，除咗招牌雙重朱古力、花生醬同Red Velvet等口味外，最近喺中環開設咗首間實體店，更推出期間限定嘅焦糖菠蘿曲奇，加入原片圓菠蘿，味道清甜又唔會太膩。
圖: 流心麻糬曲奇 Twinkie Cookies
繼續另一間由網店到實體店嘅例子，呢間就主打流心麻糬曲奇，聽到都覺得好吸引，難怪咁受歡迎喇。流心麻糬曲奇係每日新鮮製作，抹茶口味選用日本丸久小山園若竹抹茶粉，茶嘅澀味恰到好處，最正係一咬開仲有抹茶流心同自家製麻糬，口感好有層次。焦糖燉蛋曲奇都有驚喜，軟曲奇上面加上帶蛋香嘅吉士醬，再灑上砂糖燒成焦糖面，香甜帶陣陣焦香。
圖: _elllllyy_
美式厚曲奇 曲奇阿嬸
由三位80後女生開設嘅曲奇店，所有曲奇都堅持純手工製作，而且即做即買絕不存放過夜。招牌恆常口味包括雙重朱古力海鹽曲奇、朱古力曲奇、榛子牛奶朱古力曲奇、花生朱古力曲奇同日本宇治抺茶白朱古力曲奇等。同其他店唔同嘅係呢度有埋鹹味曲奇，如芝士洋葱曲奇、香蕉煙肉曲奇等，味道絕對比想像中夾！
圖: TFNG1015
文: Yanica