雖然各國開始放寬入境限制，但都唔係想飛就飛得到，不如歎個主題下午茶過下癮兼打卡先？近月有唔少餐廳推出唔同國家菜式主題嘅下午茶套餐，由法國食到意大利都無難度！
 

Summer Coral下午茶  Crust Italian 

灣仔呢間主打正宗意大利南部美食嘅餐廳推出以珊瑚為靈感嘅Summer Coral下午茶，希望將大家帶到阿瑪菲海岸！下午茶以藍色珊瑚狀嘅四層架奉上，有一系列手工甜品同精美鹹點，前者選擇包括餐廳招牌檸檬造型蛋糕，後者以海鮮為主，例如迷你阿拉斯加蟹漢堡同炸阿馬爾菲沙丁魚配檸檬汁。

供應時間：即日起至另行通知，下午3:00至5:00
價錢：$258/位，$488/兩位
 

巴黎午後時光下午茶  Town 93 Cafe

中環呢間Cafe有兩位米芝蓮3星餐廳前甜點主廚Lionel Bodros及Frederic Despres坐陣，甜品自然有水準。最近佢哋就推出巴黎午後時光下午茶二人套餐，九款茶點以經典法式美食為主，包括餐廳熱賣嘅黑松露火腿芝士吐司、源自法國南部嘅時令水果達克瓦茲蛋糕，貝殼形狀嘅迷你瑪德蓮蛋糕等，留意返每日限量供應十份呀。

供應時間：即日起逢星期三至五，下午2:30至7:00（最後截單時間為下午5:00）
價錢：$538/兩位
 

紳士下午茶  Murray Lane  

享受下午茶當然唔係女士嘅專利！中環呢間酒店餐廳就推出創新嘅紳士下午茶，以蘇格蘭夾心蛋、約克郡布甸配烤牛肉及辣根忌廉、牛小排脆批等英國特色點心為主，連英式鬆餅亦添加以山毛櫸木煙熏而成嘅車打芝士，最啱配啤酒！當中亦有甜點，包括魔鬼朱古力蛋糕、意大利芝士餅、藍莓批，無論男女都啱食呀。

供應時間：即日起逢星期六及日，下午3:00至5:30
價錢：$728/兩位
 

夏季限定下午茶  The Tiffany Blue Box Cafe

尖沙咀呢間Tiffany Blue主題餐廳單係環境已經好有異國浪漫Feel！佢哋日前推出夏季限定下午茶，經典三層架上面係各款精緻鹹甜點，唔少得一直都大受歡迎Tiffany迷你Blue Box蛋糕，禮物盒造型嘅70%黑朱古力慕絲蛋糕裡面有榛子脆脆同覆盆子醬，甜而不膩。其他精選茶點有芒果椰子達克瓦茲、魚子醬龍蝦撻、鵝肝慕絲酥皮等。

供應時間：即日起至另行通知，下午2:00至6:30
價錢：$688/兩位，額外每位$358
 

北歐風二人份下午茶  Hjem

位於港鐵上環站附近，專攻傳統挪威菜嘅北歐風Cafe亦推出二人份下午茶套餐，參考英式三層架，以木架奉上丹麥開放式三文治、迷你肉桂卷、時令北歐糕點等。傳統挪威窩夫更壓成可愛嘅心形，配搭果醬同牛奶甜酒。套餐包括北歐品牌PLŪKT嘅精選茶飲，亦可以追加北歐風雞尾酒，令下午茶更添醉人。

供應時間：即日起逢星期二至日，下午3:00至6:00
價錢：$488/兩位
 

意式蜂蜜下午茶  Cafe Roma  

馬灣泳灘旁嘅呢間歐陸餐廳就同本地推廣原蜜文化嘅香港原蜜合作，以鴨腳木樹原蜜為主設計出意式蜂蜜下午茶。精選茶點包括羅勒布拉塔芝士意式烤麵包、蜂蜜香橙雞串、荔枝芒果芝士蛋糕。更可以用優惠價參加馬灣島內蜂花園嘅生態團活動（建議預先致電報名），係畀小朋友重新認識大自然嘅好機會！

供應時間：即日起逢星期二至五，下午3:00至6:00
價錢：$168/位，$298/兩位
 

Ān大豆下午茶  Salisterra

中式食材亦可以有全新面貌，金鐘呢間酒店餐廳就聯乘米芝蓮二星餐廳總廚兼創辦人劉韻棋嘅大豆美食品牌Ān。今次下午茶就有Ān天然原味豆漿或黑芝麻豆漿，配搭多款精心設計嘅茶點，包括燴豬腩肉刈包、咖喱牛腩酥、芒果柚子撻、奶茶冬甩。客人更會免費獲贈Ān大豆奶茶抹醬，可以將大豆嘅美味帶返屋企啊。

供應時間：2022年9月1日至11月13日，下午3:00至5:00
價錢：$340/位，$630/兩位
 

甜蜜芝味下午茶  Park café  

尖沙咀呢間酒店餐廳推出甜「蜜」「芝」味下午茶，顧名思義係以鹹香嘅芝士同清甜嘅蜜糖為主題，更以可愛嘅蜂巢狀層架登場。裡面有酥炸金文畢芝士配蜂蜜汁、煙三文魚發達芝士蟹肉球、岩燒芝士蛋糕配熱溶芝士汁、檸檬蜂蜜芝士慕絲、蜂蜜柚子芝士撻等。餐廳更特別設計蜜糖特飲襯返個Tea Set，加倍滿足。

供應時間：即日起至2022年11月30日，下午3:00至5:00
價錢：星期一至五$228/位，$378/兩位；星期六、日及公眾假期$238/位，$398/兩位

優惠券：Park café「蜂」「芝」綽約下午茶自助餐及甜「蜜」「芝」味下午茶可享低至8折優惠

文：Cathy.H