講到pizza就由細食到大，仲要食開有菠蘿果啲添！但真真正正嘅意大利味道你又食過未？Franco Pepe 被稱為世界上最著名嘅薄餅大師，而佢同合夥人一齊創立嘅KYTALY亦都被譽為全球最佳Pizza餐廳，總店位於瑞士日內瓦，呢間大名鼎鼎嘅最近進駐中環啦！

KYTALY薄餅最特別就係佢嘅餅皮，同坊間嘅薄餅完全唔同，顛覆傳統薄餅造法。麵團係用Franco Pepe代代相傳嘅技術同秘方製作而成，當中有70%都係水份，食落去口感特別鬆軟，空氣感重。而且所有薄餅嘅材料，都係來自意大利，所以口味上同總店有99% 相似！

簿餅會放入特製嘅焗爐內以攝氏450度高溫烤90秒就完成，保留少量水份，令到餅皮食落去唔會太乾。

老闆特意推出一啲不含肉類嘅薄餅，因為佢覺得食薄餅都可以健康又好味。MARGHERITA DOP($180)，基本芝士+蕃茄醬嘅組合，蕃茄醬選用tomato san marzano，依種蕃茄肉厚、酸味較輕，用佢嚟製成蕃茄嘅蕃茄醬特別出色。

如果中意食芝士，可以試下SCARPETTA($280)，依款薄餅用咗兩種芝士+蕃茄醬焗成，分別係Grana Padona同Mozzarella，之後再喺面插上一片片嘅Grana Padona，芝士味香濃。

唔想咁漏既，SFIZIO AI POMODORINI($280)就啱哂，選用兩種蕃茄yellow plum tomato＋san marzano tomatoes加上少芝士，食落fresh好多！

老闆亦有推薦一啲出面比較少見嘅配搭，如RICCIO NERO($300)，材料有煙燻芝士、沙律菜同肉腸。肉腸特意選用來自意大利南部城市卡塞塔嘅黑豬品種Black Casertano，比起其他豬肉脂肪含量低。SOLE NEL PIATTO($300)，加入地中海鯷魚，鯷魚以大量海鹽醃製幾個月，一啲腥味都無，反而肉質軟滑、鹹香惹味。

店內仲有一個小型酒吧，等客人食PIZZA之餘，仲可以望住中環嘅街景Chill 下。

老闆喺今年1月開始籌備KYTALY，對於點解選址香港，佢話覺得香港人對新事物接受程度較高。餐廳地方唔算太大，因為佢希望可以控制食物質素，同時可以同食客交流下，話比佢地知真正意大利薄餅嘅歷史。而家唔駛去意大利，香港都有真正意大利PIZZA食啦！

KYTALY

地址：中環雲咸街77號嘉兆商業大廈5樓

文、相、片：Yanica