又一間韓式熱狗抵港，無論腸仔、炸油、麵粉定醬料等食材，都係嚟自韓國，仲要有真Oppa駐場親手製作熱狗添！各位泡菜仔女，識路啦？

舖位雖然細細間，但係紅黃色嘅招牌好搶眼，好易搵。呢間外賣店嚟嘅，主要賣8種口味嘅韓式熱狗同埋多款特飲。韓式熱狗，即係以麵粉混合粟粉搓成粉糰，包住條腸仔再拎去炸，炸起後再喺面層撒上蔗糖同埋淋醬。

8款口味包括韓式懷舊熱狗、經典美式、泰式辣味、印度辣味、法式洋蔥、紐西蘭美乃滋、英式車打芝士同埋意式馬蘇里拉芝士。全部都係即叫即炸，外層食落好香脆，炸粉一啲都唔厚，而且因為有蔗糖嘅關係，甜甜地之餘仲有粒粒沙沙地嘅口感。

芝士控嘅首選一定係意式馬蘇里拉芝士，雖然你就咁睇，甚至乎咬咗第一啖，都完全見唔到芝士，不過唔使懷疑人生，佢嘅水牛芝士，係藏咗喺條腸嘅中間位置！趁熱食嘅話，仲可以有超長嘅拉絲效果添呀！

至於另一款英式車打芝士，相比之下，芝士味就略為輕咗啲喇。

洋蔥奶油嗰隻好creamy，而美式經典則混合咗兩種芥末，不過只係取其香，而冇太攻鼻，反而仲有微甜感覺添。

飲品方面有咖啡、果汁、氣泡水同埋甜米露幾個系列。甜米露係韓國傳統嘅特式飲料嚟，以蒸熟咗嘅大麥、糯米再加入麥芽酵母發酵而成，味道飲落甜甜地，仲有粒粒微甜嘅軟米咬下咬下咁，幾有口感。唔怕酸嘅朋友，可以一戰五味子甜米露，酸到極致，係忍唔住要瞇一瞇眼，但飲完就好消暑解渴。

士多啤梨梳打，則加入韓國士多啤梨果醬同埋果肉製作，清新酸甜。

Bat Boys
地址：尖沙咀科學館道14號新文華中心地下26號舖

文、相、片：Kar