無論男人定女人，每個月都總有幾日身心唔舒服，食嘢要就住就住咁……呢個現象叫「糧尾」。當過咗糧尾呢幾日還好，至怕係月光族嘅朋友，長期糧尾，都唔知點捱。有見及此，開飯仔決定為大家集合一堆平價飯堂，希望可以做到各位良美嘅救星。
第一站梗係講咗中環先啦，食餐晏仔分分鐘要成八十、一百蚊喎，又唔係個個打工仔都咁幸福，有人煮埋飯你帶，而「我現時自己又唔肯做飯」……不過正所謂天無絕人之路，希望以下呢五間抵食餐廳可以幫輕下大家～
我頹的只是名字 頹飯
唔使驚，唔係介紹大學頹飯。呢間舖嘅飯盒都幾高質，價錢由$40-60左右都有。而且有菜有肉，賣相都唔差，一啲都唔頹㗎。食開嘅人都大讚隻冇骨雞髀煎得香口嫩滑，皆因全部都係即叫即煎，而且仲可以揀配飯或者意粉，記得早啲落去排隊啊，Lunch hour都好長人龍㗎。
夠份量之選 瑞士咖啡室
「瑞士」不嬲都係唔少中環打工仔嘅平靚正心水推介。呢度嘅午餐都係$50幾但就勁大碟，呢個價錢喺呢一區算係咁。如果偶然食飯食到悶悶哋，可以食個常餐。唔好以為實唔夠飽喎，一個瑞士雞翼常餐包滿足到你，加埋冇得輸嘅熱奶茶，連茶癮都滿足埋。
冇味精新派車仔麵 蜜斗
開業時間唔長，不過已經入圍2019年嘅米芝蓮。老闆視車仔麵為香港傳統，但又為咗食客嘅健康著想，所以堅持湯底同餸都冇落味精，係坊間少見嘅做法。自選兩餸麵$38，由湯底、車仔餸到拌醬都係用心之作。有好幾款車仔餸都係平時喺其他舖頭比較少見，而且仲有多款拌醬都係自家調製！
經典老舖 羅富記粥麵專家
如果想清清哋食碗粥或者麵，喺中環有一定歷史、仲有幾間分店嘅羅富記一定啱你。選擇多、粥底綿、冇味精，三十零四十蚊就有碗！呢度比較多人叫嘅麵食就係牛筋牛腩麵，又入味又腍身，啲麵又爽口，糧尾都唔一定要食得差嘅。
神級豬扒飯 炊豕店
由銅鑼灣開到入嚟中環嘅人氣店～雖然唔算話好就腳，但絕對值得過嚟食。店內飯餐約$50-60左右，最受歡迎嘅一定係秘製豬扒飯配肉燥醬。大大件豬扒，肉質嫩滑Juicy。外皮炸得酥脆乾身，所以食落唔會太油膩。而肉燥醬汁，唔使多講，簡直就係撈飯神器。
文：Yanny