熱咗咁耐，最近天氣終於開始轉涼，揀返間潮式打冷店，坐喺戶外邊食邊同朋友吹水，別有一番風味。今次精選咗8間打冷店畀大家，有唔少都係歷史悠久嘅老店或者儲落好多街坊熟客嘅口碑店，各有特色。

大圍街坊口碑店 生昌潮州海鮮酒家

住大圍嘅朋友應該都對呢間打冷唔陌生喇～質素唔錯之餘仲大大碟，性價比好高！必食招牌滷水鵝，用咗十幾種香料同中草藥等秘製而成，鵝肉入味而且肉味突出，肉質軟腍。鹽焗黃油烏頭肉質嫩滑，配自家調製普寧豆醬就最夾～另外仲供應多款潮式甜品，白果芋泥用上幾斤鮮芋頭壓成芋蓉，另加焦蔥、天然豬油同糖等，口感綿滑甜味自然。

圖: kennykin

50年老店重開 紅伶飯店 

舊年5月宣布結業嘅時候唔少人都大嘆可惜，但呢間有50年歷史、位於佐敦嘅打冷早幾個月前已經重出江湖，吸引唔少美食老饕去食！新店繼續供應招牌菜馳名滷水鵝同冰鎮芥辣墨魚片，前者鮮香味濃，後者爽口又夠fresh。除咗打冷仲有過百款小炒，如椒鹽鮮魷、椒鹽脆皮豆腐同小炒王等，送酒一流。

圖: food_fatjai

簡約典雅潮州菜 和昌潮味館 

由從事飲食業界65年潮州人高佬叔嘅第二代經營，洗脫潮州打冷大排檔嘅風格，以簡約木元素為主調。食物方面都將正宗嘅潮州菜重新演繹，鵝三味有齊鎮店三寶鵝肉、鵝肝同鵝腸，濃而不過鹹，係驚喜之作。芋蓉香酥鴨亦值得試，香酥鴨香脆充滿鴨肉香，配上香醇嘅芋蓉，層次好豐富。

餐飲券：潮州美食現金券 正宗潮汕美食 (外賣自取) 9折

圖: A姐M佬

新蒲崗老字號 陳儀興飯店

新蒲崗五十年老店，將軍澳都有分店。打冷必食嘅蠔餅盡顯師傅功架，蠔餅香脆唔油膩，每粒蠔仔都好新鮮。蠔仔粥都不得不提，一啲腥味都無，每一啖都係蠔嘅鮮味。鍾意海鮮嘅要叫埋馳名凍蟹，肉質新鮮味道鮮甜。

圖: zanvsfood

米芝蓮推介 潮樂園

連續4年獲得米芝蓮推介嘅打冷，星級鵝片係必試之選，上枱充滿光澤，入口食到滷水嘅陳香，鵝片都好有肉味，難怪咁受歡迎。特別一提嘅係午市特別抵食，滷水鵝片飯$60就食到，鵝片雙拼同三拼都只係$68同$76。

圖: westtietie

必試金沙魚皮 潮滙館

呢間餐廳喺長沙灣區已經好有口碑，主打正宗潮州菜，招牌金沙魚皮可以話係每枱必叫，鹹蛋香恰到好處，魚皮超級鬆脆，真係會愈食愈上癮。已經愈嚟愈少地方食到嘅反沙芋，呢度都做得特別出色，香甜又夠脆，而且芋頭都好靚夠晒粉！

圖: yocoyoco

傳統潮式打冷 陵發潮州白粥

比較傳統嘅潮式打冷，選擇貴精不貴多，生鹹菜同醬料都係自家製。必點蠔仔肉碎粥，蠔仔好大粒份量又足，一入口蠔味好rich，湯頭好鮮甜。

圖: Littlefishyuyu

西環米芝蓮打冷 德記潮州菜館

另一間連續4年獲得米芝蓮推介嘅打冷，招牌係胡椒豬肚湯，同坊間唔同嘅係分別選用咗馬來西亞同印尼嘅胡椒，胡椒味香醇濃厚之餘又唔會太刺激，而且夠足料，飲完真係成個人都暖晒。

圖: vivacrazyfoodie

文: Yanica