呢幾年興起熟成處理，但坊間多數都係熟成牛肉。灣仔呢間新開嘅樓上新派法國菜餐廳就嘗試更多唔同種類嘅乾式熟成肉，由多款牛扒、牛脷、羊肉到白鴿都有得揀！再加入唔同國家菜系嘅特色，展現嶄新變奏。餐廳更有豐富酒藏，可以由侍酒師按菜式推介合適嘅葡萄酒，提升餐飲體驗。
The Victuals位於灣仔，裝修走歐洲復古工業風，配上鬧市景致感覺悠閒。一步入餐廳就會見到藏酒展示區，主要用以配搭餐牌上嘅新派法國菜式。餐廳負責人之一Marco曾先後於泰國、澳洲等地嘅知名餐廳任職，因此餐廳出品亦加入各國風情，味道層次多變而和諧。
自設乾式熟成櫃 多款食材選擇
30 Days Dry Aged 'US212' Prime Striploin（$690/300g w/ 2 Side Dishes）
招牌菜之一係呢道熟成西冷，選用最高等級嘅USDA Prime西冷，乾式熟成30日或以上，充分軟化肉質而且令肉味更為濃郁。入口細嫩無渣，軟腍到好似肉眼咁，連筋位都變脆而唔會咬唔開！可以配搭少少雪花鹽，或者肉汁醬提味。
唔單止肉扒，餐廳連配菜都落足心思。其中兩款推介係Confit Chicken Fat Lotus Roots同Mashed Potato，前者以雞油先低溫浸熟再高溫炸香，脂香豐富而唔油膩，口感好似薯片咁酥脆。後者用三款薯仔製作而成，味道、水分同澱粉都恰到好處，綿滑細膩，薯仔香同牛油香平衡。
14 Days Dry Aged 'Omaha' Beef Tongue（$228）
牛脷則先乾式熟成14日，再用雞油以法式油封嘅方法醃兩日，經過慢煮24小時後最後用紅酒煮。經過多重工序令牛脷肉質變得軟嫩、腍而不爛，相當驚喜。配搭烤新鮮蘆筍、慢煮薯仔、紅酒汁同醃蘿蔔，後兩者酸味可以平衡膩感。
14 Days Dry Aged Pigeon Legs（$168）
家禽都可以乾式熟成，同樣有軟化肉質同提升風味嘅效果。例如呢道白鴿，先以日式漬法，用鹽、糖、柚子皮等醃製，再乾式熟成14日。負責人表示因為白鴿體積較細小，熟成時要更頻密觀察狀況。烤完嘅白鴿皮脆肉嫩，灑上五香粉好啱送酒！
糅合多國特色 精緻新派法國菜
Scallion & Rice Puff Toothfish Terrine（$248）
Marco參照法式鵝肝多士，將白雪魚、薯仔等打成肉醬（Terrine），包裹吞拿魚赤身，一件灑上米通另一件灑上法蔥。食嘅時候建議先淋上以橙汁同意大利白醋調配而成嘅油醋汁，將肉醬搽喺法國酥皮上，再按喜好加埋昆布醬提鮮。咁就一啖咬落有齊軟綿、酥脆、鮮甜、微酸嘅豐富層次。
The Victuals Tiramisu（$138）
經典甜品Tiramisu亦嚟個變奏版，中間加入朱古力軟心，配搭外層嘅Tiramisu蛋糕，口感更為軟綿濕潤。而且朱古力甜味無蓋過Tiramisu該有嘅酒香同咖啡香，味道香濃甜而不膩。外面以法式杏仁瓦片同朱古力點綴，特別一提朱古力打入氣泡，令口感變得鬆脆，同時保留朱古力入口即溶嘅細膩，係必點甜品！
過百支紅白酒收藏 侍酒師推介
餐廳另一位負責人Eric兼任侍酒師，希望喺度做到以酒會友，大部分引入嘅葡萄酒都以配合菜式出發，當然亦可以按客人點嘅菜式推薦Wine Pairing，相輔相成、提升風味。
Eric今次就推薦咗呢三款酒：法國Rotem & Mounir Saouma Inopia Rouge紅酒帶花果風味，酒體厚而順滑，適合配搭各款肉類主菜。而Josmeyer Gewurztraminer Les Folastries呢支白酒有荔枝、桃等水果微甜香氣，易入口而且最啱配搭頭盤。La Chablisienne Chablis La Pierrelee同為白酒，帶柑橘風味，味道偏酸，配搭海鮮同比較淡味嘅芝士就最夾。
餐廳內設乾式熟成櫃，負責人透露最近嘗試緊熟成鹿同魚肉！
The Victuals 
地址：灣仔軒尼詩道99號彰顯大廈3樓
文：Cathy.H
相：Michael
