講到英國菜，香港人最熟悉嘅當然係炸魚薯條。當地人氣Fish & Chips專門店Zan Fish嘅姐妹品牌日前正式登陸香港，嚟到尖沙咀鬧市開店！食材100%由英國進口，以傳統手法保留正宗英式風味。炸鱈魚薯條有三款唔同尺寸，最大嘅足12oz，炸完亦超過20cm長，可按喜好配搭五款精選醬汁，食得夠滋味。
 

尖沙咀店展示主廚嘅私人珍藏：球星David Beckham同Messi嘅簽名波衫！
 

曾創日售500份記錄！招牌英式炸鱈魚

The Chippy曾於2015年同2016年嘅英國文化節開過Pop-up店，當時創下日售500份炸魚同750kg薯條嘅驚人記錄！今次尖沙咀首間常設店亦由Zan Fish主廚Nickos指導同培訓每位香港員工。
 

餐廳堅持100%食材由英國入口，特別係主角鱈魚由Zan Fish負責從英國德比郡空運到港，以可持續嘅方式從北大西洋捕獲鱈魚，特色係肉質厚實飽滿、味道鮮甜。每份炸鱈魚薯條都係即叫即炸，金黃酥脆。
 

炸鱈魚薯條（$188，12oz）

炸鱈魚薯條有招牌12oz、半份6oz、魚塊2件三款大細畀大家按食量選擇，酥脆麵衣中間係雪白嘅魚肉，魚肉厚實，所以炸完亦保留相當程度嘅嫩滑。薯條就跟返英國傳統偏粗身，口感偏硬。
 

鱈魚嚟自水質潔淨嘅北大西洋水域，保留鮮味同肉汁嘅秘訣係捕獲後喺船上進行加工及冷凍，以鎖住鱈魚嘅肉質同營養。
 

五款精選醬汁加分

（前）咖喱醬、牛肉醬、青豆醬（各$20/細，$30/大），（後）番茄醬、他他醬（外賣各$8/份）

炸魚薯條嘅加分點在於五款精選醬汁，堂食可以免費添加亨氏蕃茄醬同亨氏他他醬。而另外三款秘製醬汁就需要加點（圖為細份），最特別嘅係青豆醬，食落係微酸清新嘅青豆蓉，配炸魚解膩一流。而咖喱醬帶辣，刺激醒胃。牛肉醬即係西餐常見嘅Gravy，肉香十足。
 

其他小食推介

（左至右）醃製洋蔥（$10）、醃製小黃瓜（$10）、醃製蛋（$15）

另外亦有三款配菜同樣可以解膩，除咗有漢堡經常出現嘅醃製小黃瓜之外，更有香港較少見嘅醃製洋蔥同醃製蛋，前者比較爽口，後者就比一般食開嘅烚蛋更結實，一樣有種獨特嘅酸味。
 

（左）英國辣豬肉腸、（右）炸熱狗腸（各$38）

炸鱈魚之外亦有另一款熱門街頭小食珍寶香腸，無炸過嘅英國辣豬肉腸會更彈牙。而炸熱狗腸就有外脆內軟口感。
 

（左至右）Ben Shaws - Bitter Shandy、Vimto、Fanta - Pineapple & Grapefruit、Ben Shaws - Dandelion Burdock（各$38）

四款經典英國汽水，係當地人童年嘅味道，特別Ben Shaws係英國嘅百年汽水品牌。Dandelion Burdock係牛蒡蒲公英味，草本味道唔係個個都接受到。而Bitter Shandy可以理解為帶苦嘅檸檬汽水。建議大家第一次食都係試返另外兩款味道偏甜嘅汽水喇。
 

招牌12oz炸鱈魚薯條分量十足，炸完約24cm長

The Chippy 

地址：尖沙咀加連威老道46-48號恆隆銀行大廈地下8號舖

文：Cathy.H
相：Michael