西餐廳通街都係，但喺荔枝角工廈新開嘅呢間西餐廳，就幾有特色，賣嘅全部都係手工心機菜。餐前麵包會手撕、龍蝦湯有張蝦肉紙，牛扒仲會用牛清油醃過……而且仲可以自攜餐酒，唔收開瓶費！

餐廳老闆之一嘅Jake，任職西廚超過15年，今次開餐廳仲落手落腳親力下廚，確保食物品質。各種食材盡可能都係自家製作，仲相當創新。Jake表示希望可以令大家食到不一樣嘅西餐。餐牌上約廿零款菜式，除招牌菜外，每個月都會更換。

餐前麵包絕對唔可以睇少，係每日自家製嘅呢，以意大利00麵粉做，烘起之後用手撕成不規則形狀，搽蒜蓉牛油再焗香。款式有原味、青醬、乾蕃茄同竹炭等，外脆內軟，仲好香添。

作為頭盤嘅芒果帶子卷，無論係造型定配搭都帶畀人一種新鮮感。喺西餐廳，居然有樣好似腸粉咁嘅菜式？「腸粉」皮唔講都唔知原來好多心機！係用印尼虎蝦肉、日本刺身級帶子切碎剁爛，放喺保鮮袋內鋪平，再浸熟而成。內餡包住嘅有芒果、Ricotta芝士、帶子等，口感既脆且滑。

龍蝦湯都好多功夫架。湯底以燒香咗嘅龍蝦頭，加入魚骨、蟹、大量湯蝦、紅衫魚等合成半煲湯料，慢火熬4個鐘，加埋白蘭地調香，難怪味道濃郁鮮甜。而且呢碗龍蝦湯比平時出面飲開嘅，仲多咗好多嘢！有龍蝦殼粉啦、蛋白脆餅啦，仲有張蝦肉紙。蝦肉紙係將拍扁咗嘅蝦肉再以50度低溫浸熟而成。

招牌菜之一嘅美國頂級肉眼扒可以話係必食嘅，牛魔王一定食得出呢塊扒肉味同油香都比一般嘅牛扒香，而且特別juicy。咁係因為師傅係切牛肉嗰陣，將多咗出嚟嘅脂肪，放入焗爐焗香，收集滴出嚟嘅牛油，沉澱之後最頂層嘅就係牛清油。呢啲牛清油係牛脂嘅精華嚟啊！煎牛扒嗰陣就先將塊扒浸落啲牛清油度一陣，等佢索晒啲油香呢！

甜品同樣有心思，四重滋味朱古力以法國70%朱古力製，曲奇撻底上有雜莓醬、乾子薑等，細味時會食得出，有齊晒甜酸苦辣四種味道，層次豐富。

 松露手撕雞、烏魚子番茄檸檬闊麵

Quartet
地址：荔枝角長沙灣道883號億利工業中心4樓405室

文：Kar
相、片：Tom Li