雞蛋好有營養價值，而且煮法千變萬化又好味，仲特別受健身朋友仔歡迎添！今期介紹幾間以雞蛋作主題嘅餐廳畀大家，有連鎖人氣專門店同小店等，bookmark低搵時間去試試啦～

目錄

日式流心蛋包飯 蛋哥 

圖: cw.foodie.hk

相信唔少人都有睇過來自日本一間餐廳嘅流心瀑布蛋包飯影片，而家香港都有得食喇！位於觀塘嘅蛋料理主題小店，流心蛋包飯嘅厚蛋用上4-5隻雞蛋炒成，蛋香濃郁又嫩滑，炒飯選用珍珠米，加入雞肉粒、火腿、紫洋蔥粒及椰菜等，又幾惹味～另外三色三文治、越式牛油果蛋法包、燒汁滑蛋肥牛同黃金西多士都係好受歡迎嘅菜式！

蛋包飯小店 Egg O’Clock

圖: BearbearxKoala

用心製作嘅高質小店，主打蛋包飯，佢嘅蛋包飯有好多唔同款式㗎。如原條鰻魚蛋包飯，鰻魚大大條有魚油香，香甜嘅醬汁配埋滑蛋，簡直係最佳嘅送飯配搭！蝦蝦蝦蝦蛋包飯都唔錯，有4隻吉列炸蝦，香脆又唔油膩。另外超級蛋牛治都不可錯過，皆因佢將好多邪惡嘅港式食材組合埋一齊，如午餐肉，芝士，滑蛋及沙嗲牛，鹹鹹香香，食完真係好滿足。

新加坡過江龍蛋料理 Tamago-En

來自新加坡嘅蛋料理專門店，餐廳堅持選用日本沖繩直送最新鮮嘅雞蛋製作，蛋黃色度都喺14度以上，蛋味極濃。主要供應以蛋作為主題嘅全日早餐、沙律、三文治、丼物、蛋包飯及甜品，亦都啱晒相機食先～終極TKG生雞蛋拌飯，將蛋白發至蓬鬆軟嫩，然後淋上日本醬油同自選配料，蛋香好突出。另外必試有雞蛋小食芝士明太子筷子捲、5款玉子串燒同埋梳乎厘班戟！

惹味超厚玉子燒 廟街玉子燒

 圖: iamanman

香滑又惹味嘅玉子燒又有邊個抵抗得到呢～廟街呢間玉子燒專門店選用日本雞蛋，蛋香濃郁！招牌明太子芝士玉子燒，裡面係日本明太子醬、蟹柳同水牛芝士，上面再加沙律醬、蟹籽、木魚碎。玉子燒熟度啱啱好，食落又軟又夠厚身，而且仲保留到半熟蛋汁；黑松露玉子燒都好吸引呢。

文: Yanica