而家就算出街食飯，都想搵個空曠啲、空氣流通啲嘅地方，食都食得安心啲係咪？西九文化區最近就新開一間現代手工中菜館，佔地足足有成6000呎，採納開放式設計同埋以落地大玻璃連接戶外，食客可以對住 180 度嘅維多利亞港景色同戶外空間。餐廳雖然係賣中菜，但裝修就大走活潑玩味風，而且點心同小菜方面都加入唔少新鮮元素。
餐廳由行政總廚邵德龍師傳主理，邵師傳擁有四十多年入廚經驗，佢認為作為一個廚師，要利用自己個人煮食經驗，基於傳統下不斷改良，煮出嚟嘅味道先會有進步。
煙燻片皮鴨(全隻)($688)
製作過程跟足傳統北京烤鴨做法，不過師傅就覺得平時我哋食片皮鴨嘅時候都會比一條條嘅青瓜及大蔥搶晒味，所以呢度就將青瓜及大蔥磨成蓉。佢就話先拎一塊餅皮，然後加醬汁，再放上烤鴨，最後加少少青瓜及大蔥，咁就突出到鴨嘅香氣，夠晒細緻。
黑松露法葱炸子雞 (半隻$298/全隻$588)
傳統廣東式炸子雞，選用本地新鮮雞，每日限量供應。為咗令食客除咗食到炸子雞原味外，另外配上黑松露醬及法葱醬，咁就可以轉換吓口味啦。
惹味欖菜藍龍蝦($1180)
用椒鹽方法將龍蝦炸香後，亦加入炸過嘅欖菜，可以突顯欖菜香味，惹味之餘仍然食得出龍蝦鮮味。
象拔蚌濃湯脆米浸時蔬($238)
利用濃雞湯及象拔蚌仔嘅鮮甜提升菜鮮味，加上炸脆米口感更豐富。
餐廳亦有供應一系列新派點心，好似呢個創意擺盤嘅盆栽小蘿蔔($78)、加入植物炭粉嘅黑金雪山包($68)及龍鳳配($58)，龍鳳配包一件彩虹鮮蝦餃及野雞黑魚籽燒賣，燒賣選用法國野生雞，改用雞肉係因為味道更鮮。
餐廳設有酒吧區，除咗酒類亦有供應Mocktail，啱晒唔好酒嘅朋友仔！
地址: 尖沙咀西九文化區藝術公園地下GF-01-03號舖
文: Yanica
相、片: Tom Li