走入大坑蓮花街，毗鄰蓮花宮新開咗一間稍為格格不入嘅意式小餐館，由意大利創辦人Alonzo主理。餐廳於鰂魚涌本身已經有一間分店，但新店相對地方大啲坐得舒服啲，而且景觀開揚，仲有少量戶外座位，啱晒呢個時候去食～

至尊卡邦尼意粉($188)

卡邦尼意粉係唔少人至愛！呢度嘅製法就夠晒正宗啦，今次仲喺大坑分店推出「至尊版」，選用意大利頂級小麥意粉，配上 Alonzo 親自到意大利選購嘅羅馬醃豬頰肉（guanciale pork）所製成嘅煙肉碎，口感香脆味道鹹香。每條麵條都掛滿醬汁， 每一啖都好滿足。

香烤意大利乳豬($168)

意大利式燒豬同粵式燒乳豬製法上有異曲同工之妙，豬腩肉燒至外皮香脆以片狀呈上，不過配嘅就係濃郁嘅黑森林蘑菇汁同幼滑嘅薯蓉。

蘑菇芝士焗通心粉($148)

芝士控一定唔可以錯過！呢款芝士焗通心粉混合咗紐約特色，加入四種唔同種類嘅芝士，分別為 Taleggio，Gorgonzola，Parmesan 同 Emmental， 最後入爐焗至金黃，啖啖都係「芝」味。另外蘑菇味都好突出～

牛柳薄切配巴馬臣芝士($138)

選用澳洲牛肉，再配上巴馬臣芝士、火箭菜及黑松露醬，味道又幾夾。

Tiramisu ($88)

最後當然要食埋佢哋個招牌甜品Tiramisu，質感幼滑，但相對酒味就無咁濃，可能就啱啲唔太好酒嘅朋友。

Ask For Alonzo

地址: 大坑蓮花宮西街11號地舖

文: Yanica

相、片: Calvin Kwok