過幾日就係母親節，無論今年係出街同媽媽慶祝，定自己落手煮大餐都好，送多個蛋糕畀媽媽就夠晒sweet！即刻睇下以下各款造型、口味嘅蛋糕，邊款最啱心水啦。

紅桑子玫瑰蛋糕 當文歷餅店 by Dominique Ansel

今年年頭先登陸尖沙咀嘅人氣紐約甜品店，款款蛋糕嘅造型都非常精緻，佢哋更特別為母親節推出咗呢個紅桑子玫瑰蛋糕！高貴嘅紅色鏡面上放上紅桑子同可食用玫瑰花花瓣。蛋糕味道有層次，海綿蛋糕中夾有紅桑子玫瑰啫喱、香脆開心果脆片餅乾等，味道清新，唔會太甜膩~

3D鮮花蛋糕 Bombshell

呢間餅店一向以造型取勝，將蛋糕結合3D立體元素，成件藝術品咁！今年嘅母親節蛋糕，就以鮮花為主題，其中嘅Fancy Floral Bomb，以粉色嘅蘭花為靈感，歌頌媽媽嘅溫柔同堅定！蛋糕上嘅花瓣造得相當逼真，好似真嘅一樣！

花漾紅寶石蛋糕 Häagen-Dazs

想送媽媽一個簡單又不失高貴嘅蛋糕，就可以揀呢個啦！雪糕蛋糕選用粉紅色雲石面設計，再放上玫瑰花花瓣，有如一粒紅寶石咁，超級浪漫呀~

優雅士多啤梨蛋糕 Butterfly Patisserie

呢間餅店嘅蛋糕一向簡單別緻，但又不失優雅。今年以紅色、粉紅色為主題，加上士多啤梨、紅莓等水果做點綴。士多啤梨忌廉蛋糕上，鋪滿新鮮嘅士多啤梨，再灑上金箔，即刻多咗份貴氣~

朱古力陶瓷杯 Schoggi Meier

想送一份獨一無二嘅母親節禮物畀媽媽，咁呢個朱古力獎座、朱古力棒棒糖陶瓷杯就啱晒啦！喺獎座同陶瓷杯上自訂相片，印張全家幅，或者同媽媽嘅親密合照就fit晒啦！陶瓷杯仲配上精緻嘅手工甜點，有翻糖康乃馨、士多啤梨心型棒棒朱古力等，由頭sweet到落尾呀！

花系水果蛋糕 A-1 Bakery

好似花一樣咁靚嘅媽媽，當然要襯返一個花咁靚嘅蛋糕啦！呢間連鎖餅店以花做主題，其中嘅白桃忌廉蛋糕上放有大大朵玫瑰花，蛋糕入面夾有日本大久保白桃粒同黑車厘子餡，相當清甜~而士多啤梨慕絲蛋糕上更擺有繽紛嘅花花，用上福岡縣「甜王」士多啤梨做慕絲同士多啤梨醬，好甜呢！

玫瑰花藝術蛋糕 Pâtisserie Jeffery Koo

邊有女人會拒絕收花先！呢間香港原創品牌餅店以「花．鑽」為題，推出一系列玫瑰花蛋糕，玫瑰花瓣造得相當細緻、立體，有金色、紅色玫瑰花選擇，再配以黑朱古力脆脆，高貴得嚟仲相當sweet添~

女皇蛋糕 聖安娜餅屋

在家中有如女皇一樣嘅母親大人，送上女皇造型嘅蛋糕就最適合不過啦！自日本嘅女皇糖公仔著上淡粉紅花瓣裙，入面夾住一層層嘅3.6牛奶慕絲、雜果、朱古力脆脆等。蛋糕造型夠晒吸睛，絕對可以令媽媽留下深刻印象！

天然鮮花蛋糕 A treat

呢間本地蛋糕店喺蛋糕上放上一朵朵鮮豔鮮花，選用本地水耕種植嘅食用鮮花，造型別緻，啱晒優雅嘅母親大人！每個蛋糕都係天然無添加，特別推介人氣之選，玫瑰西瓜蛋糕，清爽香甜。至於桂花烏龍茶鮮花蛋糕，除咗靚之外，仲好清香優雅，又唔使怕太heavy。

文﹕Kiko
編：Kar