一向主意多多嘅上環DK Cuppa Tea，最近又有推出新tea set啦！今次下午茶主題圍繞「潘多拉盒子」，聞住自選香薰嘅香氣來品嚐3層架下午茶，咁relax嘅時刻，梗係約埋閨蜜一齊去啦！

Tea set一共有10款鹹甜點，先來口感較light嘅（左）迷你穀物法式牛角包、沙樂美腸，以及（右）紅莓蟹柳沙律。口感鬆脆嘅牛角包帶點穀香，沙樂美腸濃郁又有咬口，濃淡有致。而紅莓蟹柳沙律入面有酸微紅莓、口感輕盈嘅蟹柳，好fresh。

韓式唧花cupcake有兩個款式，一款係（下圖）豆蓉藍莓繡球花，繡球花做得非常細緻，而蛋糕入面會有少許藍莓醬，口感清新啲，而另一款係豆蓉紅莓玫瑰花。

除咗唧花cupcake，呢隻坐定定嘅威武八哥亦相當搶眼。狗一向被稱為人類最忠心嘅朋友，一直守護住我哋身邊，所以呢隻以白朱古力做成嘅八哥朱古力配合番tea set嘅「希望」主題。

呢款海燕窩奶凍口感香滑，入面有稱為「海底燕窩」嘅珊瑚草，比燕窩有多10倍嘅膠原蛋白，有助養顏。旁邊嘅膠棒入面係抗衰老嘅藍莓酵素，客人可隨喜好唧入奶凍中，微酸嘅味道能一解奶凍嘅甜膩。

杏仁蝴蝶酥、芝士黑椒蝴蝶酥看似普通，但甚有驚喜，尤其是食到芝士黑椒味嘅時候，黑椒味比想像中強，好有後勁。

「擁抱潘多拉」下午茶
供應時間：12nn-8:30pm
價錢：$298/位、最少兩位起

DK Cuppa Tea
地址：上環新街市街19號地舖

文：Joy