掃街係唔少香港人都好喜愛嘅動作。未夠鐘食飯又掃一掃，食飽飽又要掃一掃，總之，行喺條街度見到一間間嘅小食店就會忍唔住，乜都想食！至於掃街熱點，多到接近區區都有，一於逐區去睇下。今次輪到紅磡區。
紅磡呢區，舊舊地，小店幾多下，識行識搵其實搵到好多寶！
流心芝士雞扒 魔法雞排
圖：炸雞扒都有幾種玩法，好似傳統炸皮扒、用粟米粉漿炸嘅多力滋扒等等，每種炸法嘅口感都唔同，後者嘅波浪紋令到塊扒更加脆口，一咬就會咇汁。不過講到咇汁最勁嘅，必試佢哋嘅手掌芝心雞扒！入面係流心芝士呀，見到都流晒口水。
芒果班戟 紅磡雞蛋仔
圖：雖然間舖名叫雞蛋仔，而佢哋嘅雞蛋仔仲可以揀鴛鴦口味，不過，開飯仔會更加推介佢哋嘅芒果班戟。口感鬆軟，有蛋香味，重點係夾住好多好甜嘅芒果呀，邊行邊食記住小心啲，因住跌呀。
蛋炒腸粉 美味佳
圖：長期長龍嘅串燒檔，每串都係即叫即燒嘅，所以想食都要預返少少時間呀。墨魚嘴、燒雞翼、燒燒賣等等全部都香噴噴，好脆口。除咗串燒之外，蛋炒腸粉呢道唔係周圍都有得食嘅小食，亦相當受歡迎。沾咗蛋汁嘅腸粉，表層脆脆地。
北京烤鴨煎餅 煎餅廚房
圖：煎餅有幾種口味，包括北京烤鴨、麻辣雞絲等，叫完望住師傅即刻喺度整你個柯打，睇住佢開漿煎蛋餅，落下青瓜又落下填鴨肉，再加埋烤肉醬，係會增加食慾（好似係）。不過個餅皮係軟身唔係脆口嘅，可能會同部分人嘅期望有些少落差。
Fish & Chips Jason's 炸魚薯條
圖：香港有幾可有fish and chips專門店？所以嚟到紅磡見到呢檔係幾開心嘅。炸魚都有幾種魚揀，但最傳統嘅當然係揀返鱈魚啦。即叫即炸，炸皮薄薄地，脆卜卜，魚肉亦算鮮嫩，每set仲可以揀兩種醬添，部分醬仲係自家製㗎。
魚蛋燒賣 林記小食
圖：當掃街小食愈嚟愈多種類嘅時候，呢檔依然維持最傳統嘅，魚蛋、燒賣、腸粉，而且價錢公道。間唔時都會想食返呢啲小食。腸粉就係要加埋甜醬麻醬辣醬豉油同芝麻先至有feel，呢度嘅腸粉好滑，燒賣亦唔會好粉，魚肉嘅比例佔多呀！
惹味串燒 金牌牛什
圖：另一檔串燒，燒茄子可以話係呢度嘅招牌菜，大大條，唔係淨係一味得孜然粉味，仲有好多蒜蓉、同蔥等爆到好香。另外，雞翼呀雞軟骨呀等等嘅串燒配埋自家秘製嘅燒烤醬，係幾惹味，令人食完一串又想食多串嘅。
文：Kar