《紅Van》茶餐廳嘆蘋果批 華輝餐廳
(Photos by lovebaby_v3v & Xbabychanx)
得過2010米芝蓮推介亦係電影取景地嘅華輝餐廳，兩大名物分別係蘋果批同雞批。蘋果批分細批同大批，鐘意食酥脆批皮就點細批，鐘意甜香蘋果餡多啲嘅就要點大批切件。而雞批嘅牛油皮香，忌廉雞肉亦唔老。兩款港式批雖然無一般甜品店精緻嘅外表，但樸實而有內涵。
我要初戀呀！ 彩虹小食
(Photos by moritatintin & fytung)
宵夜其中一個好選擇絕對係串燒，而呢間小食店有其他串燒店無嘅初戀芝士撞棍！其實即係芝士燒響鈴，響鈴香脆，加燒汁就唔會太乾又增加風味，加埋上面嘅半溶芝士，好味之餘夠特別，巨咖啡菇釀煙肉芝士亦係推介之作。另外仲有Star War，即係砂鍋系列，一定夠飽肚。
即拉玻璃腸粉 陳漢記
(Photos by J_J723 & sXbabychanx)
入大埔食腸粉，識食梗係食陳漢記。原因就在於佢地嘅腸粉即拉即蒸，白滑又薄身嘅腸粉晶瑩剔透，所以先有玻璃腸粉嘅美譽，腸粉入口有米香而且非常滑。另外煲仔飯亦有相當水準，熱辣辣又飯香四溢。雖然有大埔友話老店開始退步，但依然有唔少街坊捧場。
回氣菠蘿包沙嗲牛麵 華立茶餐廳
(Photos by 小YAN子 & LRA)
開完夜返到嚟想食少少嘢回個氣嘅話，大埔仲有呢間24小時營業嘅茶餐廳。最多人嗌嘅就係菠蘿油，鬆化帶少少甜嘅菠蘿皮加軟熟麵包，加埋牛油嘅香就更加無得彈。另外亦有唔少街坊會食沙嗲牛肉麵，沙嗲味夠濃之餘牛肉亦有咬口，最重要嘅係餐廳仲用緊福字伊麵，係由細食到大嘅風味。
極邪惡生炸雞髀 三多(順興)小食
(Photos by wooddot & manda_lovebobby)
喺大埔嘅雞髀界嚟講，三多認第二嘅話可能無人敢認第一，即叫即炸嘅雞髀嘅皮金黃香脆而唔油膩，仲有嫩滑有肉汁嘅雞肉。食得辣嘅一定要加辣粉，香辣炸雞配冰凍啤酒或者汽水一流！舖頭仔只開晚市，賣哂就收舖，唔想等嘅話可以早十分鐘打電話落Order，去到就有啱啱炸起嘅雞髀嘆。
街坊價百搭車仔麵 萬利小食店
(Photos by donbecbec & kikitse1750)
老實講，呢間車仔麵唔係咩絕世美食。但佢喺大埔開咗咁多年，唔少街坊對佢有特別感情。沙嗲湯底最大路亦最多人嗌，車仔餸選擇唔少，招牌雞全翼、牛柏葉、豬腸等等質素都唔錯。男士驚唔夠飽嘅話可以嗌埋一樣出名嘅腸粉。
飲港式傳統夜茶 廣生美食
(Photos by kw_jacky@Instagram & 1970mlwong@Instagram)
大埔舊墟嗰邊大部分舖頭都好早收，例如群記清湯腩，但呢間點心舖就有夜茶飲！由常見嘅糯米雞、排骨飯，到傳統嘅大包、鵪春蛋燒賣都有得賣！夜晚同朋友嚟個一盅兩件都得，得咗！小店有待用飯券，有能力嘅不妨多買兩張，幫幫社區裡面有需要人士。
隨時接收最新資訊
讚好OpenRice專頁！
