金鐘五星級酒店JW萬豪酒店入面嘅Flint Grill & Bar，上月推出咗全新周末自助早午餐，逢星期六及日供應，今次一於試試佢，睇吓有咩好食先！

Brunch分兩款價錢，想平啲可以只食基本的自助冷盤、熱盤、任叫主菜及甜品，選擇唔算多，但款款都好食係真嘅。再豪啲就要加錢食埋海鮮，有齊開邊波士頓龍蝦、鱈場蟹腳、法國麵包蟹、蝦、青口及螺等，亦有即製壽司、兩款法國即開生蠔，一入門口就見到，好難抵受誘惑啫！

餐廳中央就有凍肉如風乾火腿、芝士及沙律吧，必吃係慢煮64度班尼迪蛋，不時轉換款式，開飯仔試係叉燒，加埋流心蛋漿又幾夾喎！另一款必吃係即切肉扒，當日就有來自澳洲200天穀飼黑安格斯戰斧牛扒，肉質軟腍juicy，食完一轉仲有refill，唔會售完即止架。

無限量供應主菜有7 -9款，即叫即製，全部都係一口size，有煎魚、西班牙豬肉、雞肉串燒及意大利小牛等等，雖然話係一口，但食完海鮮、班尼迪蛋同扒，都已經飽咗一半。建議大家share來食，每款試一件。

甜品區有十多款選擇，但最好味都係即製抹茶紅豆餅，熱辣辣又唔太甜。其他甜品都做得相當精緻，好似迷你水信玄餅都有！仲唔夠可以食多杯Haagen-Dazs雪糕。

食得咁豐富當然要有美酒啦，加多少少錢可以飲到源源不絕的凱歌香檳及頂級黑龍九頭龍逸品清酒，真正飲飽食醉。雖然加加埋埋都唔平，但唔太迫人坐得舒服，亦冇搶食的情況出現，食物貴精不貴多，推介。

Flint Grill & Bar 週末自助早午餐

價錢：成人$368、小童 (3-11歲) $290；升級海鮮吧成人$228、小童 (3-11歲)$98；無限量添飲飲品每位$180
供應時間：逢星期六及日12nn-2:30pm供應

文、相、片：Perrins