唔少爸爸都愛杯中物，如果你嘅父親大人都係嘅話，嚟到父親節送酒相關嘅禮物就啱喇。開飯仔之前就介紹過自助餐，今次就同大家睇睇有咩美酒，同埋有咩蛋糕襯酒慶祝！
 

自己調無酒精雞尾酒  Lyre’s（HK Liquor Store）

呢個嚟自澳洲嘅無酒精烈酒品牌喺今年父親節推介精選雞尾酒配方，等各位孝順仔女喺呢個非常時期留喺屋企，幫爸爸調配一杯健康啲又好飲嘅Mocktail！例如經典調酒Dry Martini用Dry London Spirit、Aperitif Dry加冰混合就得。
 

個人化雕刻酒瓶  軒尼詩X.O（至醇酒庫、HK Liquor Store）

對爸爸嘅感謝之情講唔出口？呢個經典干邑品牌今年再度推出雕刻服務，等大家可以將心聲刻喺X.O酒瓶上面，成為獨一無二嘅禮物再送畀爸爸！呢款經典X.O豐腴柔厚，糅合多款香氣而不失平衡，的確好啱特別日子享受。
 

抵飲美酒入門  Marks & Spencer

想同屋企人飲杯紅酒白酒但又唔識揀？新手入門除咗去超級市場之外，仲可以考慮嚟呢間嚟自英國嘅百貨公司睇睇，佢哋入嘅酒大部分都非常抵飲，例如Garganega Pinot Grigio呢款意大利白酒都係$79/支，口感清新帶青檸同杏仁味，而且適合雪凍選享用，夏天飲一流。
 

烈酒松露朱古力  Charbonnel et Walker

平時各位爸爸可能都唔係特別鍾意甜食，但烈酒口味嘅朱古力應該就唔同講法！呢個英國高級朱古力品牌以烈酒為意念，推出Sipsmith氈酒松露朱古力同威士忌松露朱古力，分別加入Sipsmith倫敦乾式氈酒同蘇格蘭威士忌，酒味香醇。
 

威士忌造型雪糕蛋糕  Häagen-Dazs

立體威士忌酒樽造型超加分！呢間雪糕專門店今年父親節新出「威過威士忌」雪糕蛋糕，酒樽上面仲印住「To My No.1 Hero」，未食都Sweet到入心啦。雖然雪糕蛋糕就無酒味，但預設嘅夏威夷果仁雪糕都係店內皇牌口味之一，堅果味濃仲咬到粒粒果仁㗎。
 

Just for醺  Twinkle Baker Décor

大部分爸爸可能都飲開啤酒，大家可以介紹下爸爸飲下而家時興嘅精釀啤酒呀！同傳統啤酒一樣咁清爽，而且口味變化多，帶啲新驚喜畀佢哋！呢間蛋糕店聯乘精釀啤酒界龍頭少爺啤推出「Just for醺」蛋糕，兼送少爺啤限定版NAUGHTY 朱古力雲呢拿黑啤一罐，飲住食，食住飲！漏泡啤酒杯造型嘅蛋糕，以72%朱古力慕絲包住朱古力雲呢拿黑啤奶凍，啤酒泡則以黑啤蛋白霜製作。而少爺NAUGHTY就係朱古力雲呢嗱黑啤，既有可可、雲呢嗱嘅香味，亦有烘烤麥香。

無麩質爆漿朱古力蛋糕 La Viña

呢個新出嘅無麩質爆漿朱古力蛋糕，以68% 果香味朱古力、雞蛋同牛油為食材原料，完全冇使用麵粉製造，口感鬆軟。而且，食之前先將朱古力鮮奶油同朱古力碎片倒上面，就可以營造到輕微嘅淋漿效果，好似要向爸爸表達謝意一樣，愛到滿瀉。不過未必每個爸爸都鍾意食甜食朱古力嘅，另外都係新出嘅焙茶卷蛋，濃濃茶香中滲有淡淡蛋香，口感濕潤鬆軟，都係一個好選擇呀。

愛文芒果西瓜蛋糕  LIFETASTIC

呢間一向主打西瓜蛋糕嘅舖頭，今年為父親節創作咗個全新嘅愛文芒果西瓜蛋糕，底層繼續係招牌西瓜加杏仁餅底，面層放滿甜度甚高又多汁嘅愛文芒，仲有幾片新鮮西柚片乾，好有夏日氣息。

文：Cathy