經過多年努力研發，幾經辛苦OpenRice終於成功種植到全球、甚至係銀河唯一的櫻花稻米！今次我哋夥拍生物科技公司，由專業開飯人員無數日夜不斷開飯試食，仲走遍日韓台，人肉搜尋出最靚櫻花，再用世界級高科技由花瓣提煉出精華，注入白雪雪的稻米之中。櫻花米不含人造色素，絕對無香料無添加，百份百全有機種植。我哋邀請咗農夫6永同C軍，親自小心呵護培植，好似照顧和牛咁，要24小時播住日本民謠Sakura Sakura，兼同每棵稻米按摩傾偈，白米先可以呈現夢幻粉紅色，真係粒粒皆辛苦，成本仲貴過隻和牛！食落米有米味，仲有陣陣濃郁櫻花香，隔籬街都聞到飯香呀。

呢個新品種暫時只係得香港獨有，我哋將佢命名為「開飯新色米」，已經申請緊健力士世界紀錄，亦安排米之蓮舉行全球發佈會，而且請埋Gordon Ramsay（香港嗰位）任代言人。因為櫻花米實在太矜貴，只能作超限量供應，只得六粒，各位有興趣要立即show me your love，記得今日之內限時秒搶，請多多支持！

以上內容全屬虛構，如有誤導，敬請原諒。愚人節快樂！