放題、任食本身已經好開心，有間喺銅鑼灣新開嘅火鍋店，有得任食之外，仲有得任飲。仲要唔係普通嘅汽水喎，而係台灣特飲、紅酒白酒cocktail通通都可以免費任飲！

呢間主打海鮮涮涮鍋嘅火鍋店，有近日大熱嘅卜卜蜆海鮮鍋。介紹之前先講下晚巿$388就有高級海鮮火鍋任食係咩玩法。呢個任食，係喺餐廳限定嘅手工涮涮鍋套餐嘅基礎上，再無限追加。

話明係set，當然會有前菜、主菜同甜品。前菜係手工麻辣麻醬手撕雞同秘製麻辣木耳，甜品就係木糠奶茶布甸（珍珠或香芋味）。至於主菜，即係個鍋就有10個選擇，海鮮控可以考慮冬瓜卜卜蜆海鮮鍋，湯底夠晒清甜；食得辣嘅海鮮控，有香辣三杯卜卜蜆涮涮鍋；但如果想清清地消下暑，都有酸菜白肉鍋。

見到一隻隻蜆冚滿晒個鍋，係興奮嘅，食落都幾有鮮味，仲令到成個湯底都鮮甜咗。

而打邊爐必食嘅響鈴同炸魚皮，都係手工嘢，響鈴用料係嚟自大埔樹記嘅，特別香脆，腐竹味好出，記得唔好浸太耐，一秒好上返嚟喇。

牛肉或者豬肉就每兩位送一碟，4個人就可以叫一牛一豬喇，牛係手切安格斯Prime Grade牛頸脊肥牛片，脂肪雪花多得嚟都平均，肉質腍而牛味重，豬就係西班牙伊比利亞黑毛豬肉片或者玫瑰黑毛豬頸肉。

特別要介紹下兩款火鍋拼盤，手工系同台灣夜巿系。手工系嘅有釀埋冬菇入去嘅墨魚汁鳥結糖、一半蝦滑一半墨魚滑嘅太極冬菇、黑松露蟹肉餃同黑松露芝士豚肉餃等等；台灣夜巿系就有滷水豬耳、大腸之類，連滷水蛋同鹽水雞翼都有，但最估佢唔到係仲有紫薯水晶包同紫薯芋圓、地瓜圓。未食之前都想像唔到淥完會係咩味~~ 試完答案係……

甜味！芋圓幾甜，紫薯水晶包未淥之前成粒魚蛋咁，淥完就變咗透明，咬開嘅紫薯蓉都幾香。

大胃王可以再畀多$58，追加有美國桶蠔、鮑魚、海蝦等等嘅海鮮拼盤。當然都可以追加其他菜呀麵呀肉呀咁。

Last but not least，酒精類同非酒精類都係免費任飲。酒鬼開心死，有6款cocktail、2款生啤同紅、白酒各1款任飲，配返牛肉同海鮮係幾爽。紅酒都唔曳㗎，RP評分都有85。不過興奮還興奮，量住嚟飲呀，溝酒飲容易醉呀。就算唔飲酒，任飲倒插巨峰提子x汽水沙冰、水果冰茶、珍珠奶茶系列其實都抵飲。

101 Grill Bar + Hot Pot
地址：銅鑼灣登龍街1-29號金朝陽中心2期29樓全層

文、相：Kar