個個都想去旅行，有餐廳聽到大家嘅心聲啦~ 由調酒大師Antonio Lai 主理，嚟自台灣嘅「Cocktails On Tap」店Draft Land，近日進駐銅鑼灣，同Little Bao創辦人May Chow聯乘合作，喺餐廳度開設咗個小型酒吧區，以特色雞尾酒同小食帶大家環遊世界，去一轉台灣同韓國。

台式魯肉流心炸蛋係阿May自創嘅，沾上麵包糠嘅台式魯肉，中間包住成粒半熟日本蛋，炸到外層金黃酥脆，入面重係軟香嘅蛋黃，鹹香中帶蛋香，層次感豐富 。

招牌豬腩包嚟個韓版變身，加入柚子製作，令到肉香中又帶有微酸，惹味得嚟又輕輕中和返膩感。

生菜包炸雞則crossover咗台式鹽酥雞製法同埋韓式燒肉食法，提供咗金不換油蛋黃醬同LB韓式辣醬兩款自調醬汁，可以用新鮮生菜同芝麻葉夾埋一齊食，又fresh又脆，滲住陣陣嘅香辣味都咪話唔過癮。

粉絲們都一定食過經典雪糕包，以炸饅頭夾住厚厚嘅雪糕，邪惡又如何？！今次合作當然有酒吧限定口味——焦糖大醬味啦。甜甜嘅焦糖香中，隱隱散發住一陣烏龍茶香，完全係happy ending。

小型酒吧區裝咗6個酒頭，喺合作期間會不定期供應多款唔同口味，主要以韓國米酒、梅酒為基調嘅cocktails on tap。除咗幾款常設招牌雞尾酒外，其中兩款韓式雞尾酒更係首次登場呢！「我愛韓梅」以威士忌、梅酒、薑和蘇打水調製，酸酸甜甜好醒神；「梨咪走」則用咗冧酒、梨汁、米酒同接骨木花糖漿調配，啖啖都係梨果嘅甜香。

小包包
地址: 銅鑼灣京士頓街9號Fashion Walk 地下H1號舖

文、相、片：Kar