九龍區繼續有新Cafe，呢間走黑白型格風，唔少食物亦加入黑白元素，好似黑色嘅糯米窩夫配白色嘅牛奶雪條，搶鏡同時又好食。其他食物都有水準，必食雞蛋布甸，淋上House Espresso後啡香同甜味交織夠特別！
 

Contrast裝修以黑、白、灰為主調，負責人指由店名到主題，都係想回應返而家嘅社會，希望可以表達容納社會唔同角度嘅聲音。店內亦不時有展覽，例如最近就有香港攝影師林健恆嘅《都市·病》攝影展。
 

牛肉漢堡配牛油果角（$96）

用安格斯牛肉製作嘅漢堡扒牛香濃郁，扎實得嚟又唔會乾。竹炭麵包亦係餐廳特別訂製，相當鬆軟而且回彈快。裡面仲有芝士、菇、蕃茄、沙律菜等，口感豐富而且減低牛肉嘅油膩感。配菜炸牛油果角外層鬆脆而果肉柔軟，口感討喜。
 

墨魚汁扁意粉伴蟹籽（$78）

扁意粉加上墨魚汁，唔單止變成搶眼嘅黑色，亦增添一股墨汁嘅香氣。意粉食起嚟夠al dente，而且有蟹籽一粒粒嘅咬口，好過癮。間中可以沾碟邊嘅芝士同紅椒粉一齊食，轉變一下口味無咁悶。
 

雞蛋布甸配House Espresso（$58）

建議大家可以先試原味，再按自己喜好加入咖啡。布甸口感軟滑Creamy，就咁食先品嘗到雞蛋香同甜味，最後有焦糖嘅微苦餘韻，所以同有奶香嘅忌廉一齊食都唔會太膩。House Espresso風味偏莓果香，酸味同甜度平衡，同布甸嘅焦糖醬好夾！
 

Contrast糯米窩夫配自家製牛奶雪條（$96）

窩夫呈黑色而且口感特別煙韌，因為加咗竹炭粉，加上係用糯米粉製作！食落有淡淡米香，脆邊加上濕潤煙韌嘅口感幾特別。而白色嘅雪條其實係自家製牛奶雪糕，口感比起雪糕更似慕斯，牛奶香圓潤明顯。配搭香甜嘅忌廉、帶酸嘅紅莓醬同有奶香嘅鮮奶醬，甜而不膩。
 

 

Latte（$38）

House Blend咖啡糅合巴西、哥倫比亞同埃塞俄比亞三個產地，巴西嘅豆比較Nutty而其他兩個地方嘅豆較為Fruity，所以咖啡飲落係偏莓果嘅酸甜味，Latte口感柔滑。
 

Valrhona Coco（$42）

朱古力亦用咗兩種朱古力配搭而成，朱古力香突出嘅同時甜度適中。
 

Contrast
地址：長沙灣福榮街512-518號依時大廈地舖

文：Cathy
相、片：Calvin Kwok