喺韓國有逾800間分店嘅連鎖果汁店JUICY，有韓國 No.1 果汁店之美譽，主打多款以新鮮生果製作嘅果汁、奶昔等。之前曾經喺中環同尖沙咀開過舖，最近強勢回歸，登陸港島東鰂魚涌，仲有全港首創嘅熱飲果汁、新推嘅果香乳酪，同埋炸雞拼盤小食呢。

  (最前) 蜜桃乳酪

乳酪係今次新加入menu嘅飲品，3種口味包括有蜜桃、芒果同士多啤梨，上層係新鮮現打嘅果汁，下層則係幼滑嘅乳酪，打完卡後記得要撈勻先飲啊。蜜桃乳酪甜中帶微酸，醒胃得嚟又冇乜太大罪惡感。

 芒果草莓汁 

講到打卡，當然要推介一下顏色鮮艷嘅芒果草莓汁，紅紅黃黃好sharp醒。果汁口感較稠身，兩隻果香嘅平衡做得唔錯，酸甜有致，芒果同士多啤梨味都飲得到，冇話邊個特別搶fo啲。

  熱草莓香蕉汁

冬天最好梗係飲熱嘢，而懂養生嘅女孩子更加係一年四季無分凍熱都會飲熱嘢，咁全港首創嘅熱飲果汁就係最好嘅選擇喇。將新鮮生果榨成汁後，店員會以咖啡加熱器慢慢將果汁加熱，原來嘅營養同纖維亦得以保留。特別推介熱草莓香蕉汁，果味濃郁，香蕉味相對突出少少，更有粒粒士多啤梨籽食到呢。

  韓國蜜柑汁

問下店員，分分鐘重有Hidden menu嘅韓國蜜柑汁呢，來自濟州嘅韓國蜜柑含胡蘿蔔素，有抗氧化功能。凍、熱嘅選擇都有，真材實料嘅蜜柑汁，口感濃稠，不過可能都會有些少澀身。

 Juicy Chicken Combo

新店唔止有果汁飲，有埋嘢食𠻹啊，主要係各種香口炸嘢，例如薯條呀、炸雞呀咁。Juicy Chicken Combo就最豐富，有齊炸雞柳、一口雞、炸洋蔥圈、炸雞粒同薯條，淋上茄汁同甜甜地嘅蜜糖芥末醬都幾惹味。幾款炸雞各有唔同口感，但一樣都係脆卜卜，特別係一口雞，嫩滑juicy！

 Sica應援

新開張期間，唔止有買嘢飲第二杯半價嘅優惠，重有《全民造星IV》中深受網民歡迎嘅Sica（何洛瑤）應援物資，主席嘅粉絲要去朝聖喇。

JUICY Fresh Juice Bar
地址: 鰂魚涌海灣街4-6號嘉榮大廈地舖

文、相、片：Kar