最近喺Instagram上面多咗人分享一杯用牛油果裝住嘅咖啡，原來係灣仔呢間新開飲品店嘅出品。招牌Avolatte之外仲有健康即磨果汁、Smoothies、輕食等，連Secret Menu都有，咖啡又可以改用植物奶，驚喜位十足！
 

兩大招牌咖啡

Avolatte（$48）

Athletic Juice & Espresso Bar位於灣仔星街，店如其名主打一系列咖啡同果汁。最近最多人嚟嗌嘅就係呢杯Avolatte，而用牛油果裝咖啡呢個諗法嚟自澳洲一位咖啡師，當時引嚟唔少咖啡師有樣學樣，但真正推出市面嘅少之又少。所以呢度嘅店主同咖啡師就決定試下將佢真正帶到香港。
 

原隻牛油果即叫即開，挖空部分果肉後倒入House Blend咖啡，再以牛奶拉花。而最底用100%牛油果肉壓成蓉，方便固定牛油果。至於點飲就隨個人喜好，一邊飲Latte一邊挖果肉食得，飲完咖啡再慢慢食牛油果亦得。其實Latte同牛油果無論味道同口感都幾唔同，唔算衝突但加埋一齊亦唔會有好大驚喜。
 

Beetroot Latte（$48）

Secret Menu之一，喺Latte當中加入用Slow Press Juicer打嘅紅菜頭汁，特點係零舍濃郁而且保留纖維，令呢杯Beetroot Latte帶搶眼嘅暗紅色之餘，仲更加健康。飲落味道比一般Latte帶少少紅菜頭嘅甜，但無任何草青味，而且口感柔滑，值得一試。
 

健康果汁Smoothies

J01 - Athletic Core（$55）

呢杯招牌果汁用咗蘋果、紅菜頭、紅蘿蔔、薑同檸檬，即叫即打，而且按唔同食材嘅特性會分別以唔同榨汁機或攪拌機，盡量保留蔬果當中嘅水分之餘亦令果汁口感更滑。呢杯算係保留比較多纖維嘅一款，味道以紅菜頭嘅甜味為主，之後會慢慢飲到薑嘅微辣同檸檬嘅酸香，層次豐富而且感覺清新。
 

S07 - Marathon Booster（$55）

而水分比較少嘅食材會加入冰粒打成Smoothies，好似呢杯當中就有龍舌蘭、杏仁奶、牛油果、香蕉同椰子水。味道以牛油果同香蕉為主，味道層次比較少，口感算幾柔滑，偶然先咬到一兩粒細冰粒。
 

仲有其他驚喜位！

Banana Bread（$26）

雖然舖仔細細，但亦有提供幾款輕食，包括自家製嘅香蕉蛋糕。叮熱後香味誘人，咬落會有核桃碎同香蕉果肉，蛋糕亦夠濕潤。最抵讃嘅係香味自然唔過甜，唔係落香精整出嚟嘅人工甜味。
 

英國Rude Health植物奶

Smoothies特別選用英國Rude Health品牌嘅植物奶，全部都係有機、不含麩質或乳製品而且無額外加糖。其他咖啡亦可以免費轉用Rude Health嘅多款植物奶或者Bonsoy豆奶，太多選擇唔知點揀好？第一次可以選擇味道較淡嘅Oat Milk或者Brown Rice Milk，有興趣嘅話仲可以買走自己沖飲品（$45/盒）。
 

Detox Water

舖頭每日仲有唔同口味嘅Detox Water畀大家免費飲用。而為咗響應環保，歡迎大家自攜可重覆使用嘅杯方便Take away。大家嚟飲杯嘢休息下嘅時候，不妨都為自己同地球健康做多步！
 

Athletic Juice & Espresso Bar
灣仔星街2E號地下

文、相、片：Cathy