台式茶飲風永遠不滅！翰林茶館呢間茶飲店被稱為珍珠奶茶始祖之一，巴閉在佢嘅國宴珍珠奶茶係被台灣政府指定用嚟招待外賓，仲有首創嘅黑白珍珠奶茶同各款用茶製成嘅麵食+小食，今次呢間台南老字號終於殺入尖沙咀！

熊貓鮮奶茶($38)

嚟得翰林茶館點可以唔飲珍奶！呢杯黑白珍珠奶茶係由翰林茶館創辦人首創，茶底係紅茶再加入鮮奶油，味道醇厚濃滑。奶茶入有齊白珍珠同黑珍珠，白珍珠細細粒較有咬口，黑珍珠就大粒啲比較煙韌，本身帶有少少甜味，一杯就有齊兩種口感！

國宴珍珠奶茶($58)

國宴珍珠奶茶可以話係國寶級奶茶，因為佢比台灣政府選為招待世界各地外賓嘅指定珍珠奶茶，紅茶底嘅茶葉經過特別挑選，用上特優級紅茶，茶味雙倍香濃，變相飲落無咁甜。

紅燒牛腩茶麵($78)

因為翰林茶館創辦人同時都係一位茶藝師，佢覺得茶葉唔單止可以泡嚟飲，仲可以加入食物入面，所以麵底特意採用鐵觀音茶麵，食落有淡淡茶香，越食越香濃。湯底用豬骨同雞殼熬成，味道濃郁；牛腩都炆得軟腍。

干貝蔥油伴麵($58)

加咗炒過嘅干貝同蔥油撈茶麵，有少少辣，食落去鹹香惹味，同時唔會蓋過茶麵香氣。

普洱茶葉蛋($12/個)

平時嘅茶葉蛋多數用鐵觀音滷成，翰林茶館改用雲南普洱，再用特製滷包滷足三日三夜，連蛋黃都充滿茶香。

草莓果粒紅茶($42) 、龍涎香(文人茶)($148)

草莓果粒紅茶係香港店限定，將果味燻入茶包，再冷泡足12小時，果味好香！如果想Chill啲可以叫壺文人茶慢慢嘆，所有茶葉都經過嚴格挑選，再拎去烘焙，雖然係烘焙出嚟，但炭香味唔會太多，反而茶香味濃。

翰林茶館

地址: 尖沙咀廣東道3-27號海港城港威商場2樓2602號舖

文、相、片：Yanica