銅鑼灣都可以有戶外露營感覺，同朋友坐草地吹水飲酒食嘢？入到室內又好似去咗日本滑雪嘅resort咁開心？啱呀，有間由3位90後開嘅日式酒吧，以日本登山滑雪勝地長野縣白馬村同酒吧小屋為主題，就可以同時滿足晒咁多個感覺喇。

幾位創辦人都好鍾意登山同滑雪，於是就將酒吧打造成日本滑完雪去嘅Lodge Bar咁樣樣，冇得飛都感受下個feel嘛。室內設計以啡色木柱同木材為主，樓底高、空間闊，閒閒地都可以坐返三五個鐘；室外仲開心，set到好似去咗露營咁，連彩色搖椅都有，打卡最啱！

 Breakfast in the Alps

主角就梗係充滿特色嘅cocktails啦，有啲仲要係獨家研製嘅添。好似Breakfast in the Alps咁，就以冷泡製成嘅咖啡冧酒，加入焙煎茶味嘅利口酒、蕎麥味糖漿同朱古力苦精，用露營杯裝住上，特別有feel。咖啡味濃郁，仲可以加奶添。調酒師解釋，選用蕎麥去煮糖漿，係因為蕎麥係長野特產呀，夾返餐廳嘅主題~

 Purple Skii

由創辦人研發嘅仲有粉紫色嘅呢杯Purple Skii，由sake、自家製薰衣草玫瑰糖漿、檸檬汁再加櫻花味氈酒調製而成。面層加多層蛋白霜，灑上玫瑰花瓣，單係賣相已經贏盡少女心。味道清香，帶有陣陣花香，甜甜地好易入口。

 初露

Gin酒迷唔能夠錯過呢杯初露，以香港人製作嘅白蘭樹下gin酒做基調，加入意大利佛手柑利口酒、紫蘇味利口酒同tonic water製成昇華版嘅gin tonic。白蘭樹下本身嘅花香已經好突出，夾埋陣陣佛手柑香味，整體感覺都係香氣滿溢。放喺杯邊嘅紫蘇葉裝飾更係神來之筆，未飲之前已經先為為嗅覺醒一醒神。

飲酒梗係要送下啲小食，微甜嘅脆炸蕃薯條、拉得絲嘅芝士條同陣陣鹹香嘅香炸雞軟骨都係唔錯嘅配搭，全部都脆脆der，食唔停口。

想食得飽肚少少嘅都有丼飯嘅選擇，牛肉丼飯片片汁燒牛肉鋪面，仲有隻半熟蛋添。

Lounge Hakuba
地址：銅鑼灣謝斐道535號Tower 535 3樓302號舖

文、相、片：Kar