各位雞翼控同黃埔街坊注意！最近新開咗間小食店，專賣唔同創新口味雞翼。好似甜得嚟又有花香味嘅玫瑰，估你唔到咁夾嘅咸檸七，同充滿港式風味嘅避風塘口味！
 

雞翼山係中環Sogno Cafe+嘅姐妹店，將Cafe嘅招牌玫瑰雞翼帶到黃埔，仲新增其餘六款新口味。雞中翼全部醃過一日，選用日本炸粉而且即叫即炸。所以睇粉紅同白色為主既裝修以為走少女路線？Sorry鍾意食雞翼嘅朋友不妨唔好講咁多儀態，食咗先講！
 

文青風玫瑰雞翼（$48/6件）（$38/4件，$128+2款飲品）

招牌口味當然係必試，雞翼炸好後加入店家秘方調製嘅玫瑰醬炒香，再加香草碎同玫瑰花瓣調味。一拎上手就覺得充滿玫瑰甜香，而且玫瑰味道自然，唔會有食緊香精或者Hand Cream嘅感覺。
 

咬落雞翼皮脆肉厚，Keep到少少肉汁。味道比其他幾款甜，但食多幾隻都無覺得膩，果然係招牌口味。
 

我係鹹檸七雞翼（$48/6件）（$38/4件，$128+2款飲品）

另一推介係鹹檸七口味，真係有落七喜汽水同鹹檸檬去煮醬汁，加上真係坊間少見。食落先食到鹽嘅咸味同汽水嘅甜味，之後就有鹹檸檬嘅香味慢慢滲出嚟，意外地同炸雞翼又夾得埋。
 

濃味三重芝士流雞翼（$48/6件）（$38/4件，$128+2款飲品）

而芝士控當然唔好錯過三重芝士口味，芝士醬係用咗丹麥車打芝士、瑞士大孔芝士，同意大利Mozzarella芝士調配，最後仲會加上芝士粉。雖然做唔到拉絲效果，但芝士鹹香同香口嘅炸雞翼當然夾啦。

其餘雞翼口味仲有熱情果、港式避風塘、檸香山葵蟹籽同味噌選擇。而且每款口味都可以揀雞中翼或者雞槌。
 

（左）招牌莫希托式薄荷特飲，（右）天空藍鮮檸檬特飲（單點$28，套餐$18）

夏日炎炎，食炸雞翼最好配返杯冰凍特飲啦係咪？呢度有三款選擇，可以按揀既雞翼口味揀返最夾嘅飲品。薄荷特飲係無酒精版本嘅Mojito，味道清新解渴，開飯仔覺得薄荷味可以再突出啲，不過而家甜味重啲都符合返大眾口味嘅。而藍色就以檸檬同青檸味為主，微酸開胃。
 

幫大家問過負責人，其實佢地都鍾意創新，希望新店穩定之後可以推出唔同季節或者節日限定雞翼口味比大家選擇！而雞翼即叫即炸需要時間，無論即食定外賣，大家都預返要等5-10分鐘，等既時候不妨去外牆打個卡先啦。

雞翼山
紅磡黃埔德民街29號黃埔新村德民大廈地下F3號舖

文、相、片：Cathy