香港有唔少夜鬼，都有個共通嘅問題，就係：為何深宵總是餓？然後就引申另一個問題，夜麻麻去邊度搵食？唔通次次都淥個杯麵咩？唔使煩，各區都有唔少深夜食堂，開飯仔同你哋逐區去食宵！今次去飯局熱點銅鑼灣，唔少都係香港人最愛嘅日本菜～
獨立房唱K食宵夜 Cosmos@RedMR 
呢間概念店分共用空間同獨立房，三五知己喺獨立房裡面想唱K、睇波定睇Netflix都得！最重要係Menu選擇多元化，由簡簡單單飲杯咖啡、最近大熱嘅芝士吐司，到食個豐富晚市套餐都有。加上各款特飲、清酒同Cocktail，夠晒Chill。
收舖時間：03:00（星期五至六）、00:00（星期日至四）
優惠券：85折COSMOS晚市套餐優惠
東京麻辣拉麵 鬼金棒
呢間嚟自日本東京嘅拉麵店主打辣麻味噌拉麵，即叫即製嘅味噌湯底加上多款辣椒製作嘅唐辛子，同以頂級和歌山葡萄山椒加多種山椒調配嘅香麻油，有五級麻度同五級辣度選擇。芫荽控記得要試芫荽辣麻味噌拉麵，芫荽清香十足！
收舖時間：00:00
超多款日式豚肉串燒 Mokumoku Yakiton
由日籍料理達人Kei San監修嘅日式豚肉串燒専門店，特別引入嚟自日本岩手縣嘅白金豚，特點係油花分布勻稱，肉質鮮嫩富彈性！而豬內臟就用本地限量即日貨，所以會有坊間少見嘅豬腰、豬心及豬肝串燒，加上調味得宜，完全無腥味㗎。
收舖時間：01:00
人氣深宵食堂 心燒食堂
喺銅鑼灣提到開到深夜嘅人氣食堂，就唔少得呢間主打特色串燒嘅居酒屋！想豪少少當然唔少得嚟返碗月見海膽飯，鋪滿香濃鮮甜嘅海膽，啱相機食先又夠滿足。串燒方面唔少人就推介心燒免治雞肉棒同燒特級牛脷芯，前者雞肉彈牙醬汁香甜，後者外脆內軟。
收舖時間：02:00
廣島沾麵+廣島蠔 廣島沾麵本舖爆彈屋
圖：au9
呢間係嚟自日本廣島嘅過江龍，主打辛味噌廣島冷沾麵，沾麵汁辣度由0到200倍任揀！火紅色加上芝麻嘅沾麵汁辣味屬於慢慢滲出嚟嘅，一食落口可能覺得OK，但後勁悠長。餐廳另一主打係新鮮廣島蠔，無論係生蠔定炸蠔都有捧場客。
收舖時間：02:30（星期一至六、星期日休息）
滬式粢飯豆漿 上海香港麵家
圖：cowing
粢飯同鹹豆漿係唔少上海人嘅早餐，不過因為呢間餐廳同便利店一樣24小時無休，所以深夜嚟食一樣得，嘻嘻。粢飯係糯米包住油炸鬼、肉鬆，同榨菜，口感豐富。而鹹豆漿就係熱豆漿加蝦皮、榨菜、油炸鬼、麻油等，第一次食真係未必慣，勝在口味幾正宗。
24小時營業
文：Cathy
