2022年，繼續同大家數榜。新一年開始咗一個禮拜左右，就又再次冇咗晚巿堂食。所以觀乎十強名單，主要分咗兩類餐廳，一類就係無論環境同食物都高質嘅餐廳，一類就係輕食，方便快食或外賣嘅小店。
第10位 陳儀興飯店（*新上榜）
圖：喺新蒲崗起家嘅潮州打冷店，早排喺將軍澳開分店，深得區內街坊歡迎。1月即使冇晚巿堂食，外賣一樣做到冇停手。鹵水拼盤材料豐富，紅腸、大腸、鴨掌、鹵蛋、生腸等近10款鹵味，款款入味。好多人鍾意食嘅蠔餅，好難得外賣拎到返屋企重係脆口，大大粒蠔仔亦夠香口。
第9位 SOYmart by 豆乳狂人（*新上榜）
圖：喺荃灣商場內嘅豆乳小店，一直不乏客人支持。小店主打多款創新嘅豆乳飲品、雪糕同小食，每日新鮮即製，當中以招牌7.6特濃豆乳嘅豆香最為濃郁，而其餘新奇配搭例如芋泥、桃膠豆乳等，亦同樣帶有驚喜。喺減少堂食嘅呢段時間嚟講，自然吃香啊。
第8位 你妳（*新上榜）
圖：一向都好受歡迎嘅台式餐廳，以厚墩墩嘅吐司作招徠，大大份三文治夾住芋泥炒蛋同芝士，好有台灣早餐嘅感覺；份量十足嘅鹽酥拼盤便當亦係人氣之選，喺冇得去旅行嘅日子，特別懷念。另外1月有幾款新菜式，好似大過隻手掌嘅鹽酥天使大雞扒，炸至外脆內嫩，係吸引嘅。
第7位 Muse Furniture Lab（*新上榜） 
圖：位置係就係偏咗少少，但全黑型格裝修、華麗英倫風設計同傢俱，重有大大片綠草地，個個位都係打卡位，自然吸引到好多朋友趁住假日去chill返半日。煙三文魚配奶油芝士法式可麗餅絕對值得一試，淨係隻流心太陽蛋同芝士都爭取咗唔少分數，整體口感滿有層次。
第6位 Mo Mo Kushiage
圖：主打關西風味嘅日式串揚店，係畀大家回味日本嘅好地方。大部分食材均由日本直送，叫個炸串拼盤就最開心，有齊炸天使蝦、安格斯牛西冷、日本豬頸肉等，樣樣都食。另外串揚魚定食就有吉列三文魚同鰻魚，炸皮薄薄一層，脆卜卜，魚又夠厚肉，好有口感。
第5位 MEMOIR（*新上榜）
圖：堂食機會彌足珍貴，好多人都比以前捨得使錢咗，傾向揀啲貴少少但高質嘅餐廳。好似銅鑼灣呢間高層餐廳咁，供應精緻西菜同亞洲菜，烤紐西蘭肉眼扒9oz配薯條烤厚切紐西蘭肉眼足足有9oz，肉汁juicy帶焦香；fusion菜燒鰻魚意大利飯啖啖都有濃香嘅鰻魚燒汁甜味，配搭幾有新鮮感呢。
第4位 為食龍（*新上榜）
圖：主打日式腐皮壽司嘅呢間餐廳，以前喺銅鑼灣時已經好受歡迎，曾2次入圍十強餐廳，而家搬店至中環後，由立食店變到有2層高，並繼續得到大家捧場推入十強。去到當然要試招牌腐皮壽司set，以高湯浸過日本腐皮後，更能突出海鮮鮮味。西雅圖鬼妹亦係人氣款式，即係火炙牛油果三文魚腩，層次豐富。
第3位 NINETYs Roastery（*新上榜） 
圖：呢間café嘅店主大有來頭，曾喺美國世界咖啡拉花比賽中奪得亞軍，各位咖啡迷當然要慕名前往啦，記住要試fruity blend 咖啡，口感香滑，果香味重。食物方面，最signature嘅一定係Jumbo Piggy Piggy，即係夾住自家製叉燒+滑蛋+羽衣甘藍等沙律餡料嘅巨型潛艇，啲料多到要瀉出嚟咁滯。
第2位 Ikigai Concepts（*新上榜）
圖：佔地成萬二平方呎嘅呢間日本料理，地方夠晒大，既有omkakse，亦有鐵板燒同和風料理，選擇多化，價錢亦親民。而且重有部自助清酒機，配套一流。食料理嘅話可以試下日本鯛魚湯稻庭烏冬，魚湯濃郁鮮香。能夠喺眾多日本料理中跑出，同佢哋肯創新不無關係，例如餐牌中較特別嘅有原隻車海老釀蝦膠，或者明太子魷魚，創新嘅配搭效果唔錯。
第1位 Hero's Friday（*新上榜）
圖：榜首位置係屬於紅磡呢間burger小店，足以證明burger係港人嘅長期至愛同comfort food。而呢間burger店最特別嘅地方，就係會用pancake嚟做「漢堡包」。未試過嘅朋友第一次記住試豬柳蛋咖啡班堡，班戟質感鬆軟，同埋真係食到咖啡香味，係一個幾特別嘅體驗。當然要推介埋招牌隊長漢堡，塊扒有成1cm咁厚，肉味濃郁，搭埋煙肉、煎蛋、番茄、芝士等一齊食晒佢，係滿足，而且感覺都唔會太膩。
文：Kar