各位老婆注意：男團ERROR成員193（郭嘉駿）同拍檔合夥經營嘅精品咖啡店呢個星期日（4月10日）開張啦！三爺點解想開Cafe？ERROR成員各自最啱飲乜野？食物同一般Cafe有咩唔同？等三爺親自解答！
三位拍檔Ringo、Adam、Sam同郭生（193訪問時自稱）係中學同學，最近一齊開Cafe，各自負責咖啡、食物、設計同Marketing
Tanuki Coffee位於土瓜灣，193指鍾意呢個地方有新舊融合嘅Feel。老婆（193粉絲名）應該都知道193經常去Cafe打卡，佢提到呢個鋪位可以做到有自然光嘅室外座位，而且內街嘅車唔會太多，感覺特別Chill。
裝修搵咗香港設計師幫手，跳出一般木系或清水模風格，以太空艙為主題，加入科幻感Cafe以黃色為主題色，以狸貓為吉祥物，原來都係193嘅主意。揀黃色係因為夠搶眼又有記憶點，而狸貓Tanuki係日本獨有品種，同時感覺又Cool啲。
Coffee Tonic（圖左，$55）有漸層效果，把握時間打卡然後趁有氣嘅時候飲啊！
193單飛開Cafe，如果ERROR成員嚟到會推介邊杯嘢飲呢？三爺指阿Dee都鍾意飲咖啡，所以會推介Coffee Tonic畀阿Dee消下暑。
Pineapple Ginger Soda（$45）嘅黃色係特別用嚟襯返Cafe主題色
而保錡同肥仔呢，三爺觀察到佢哋比較少飲咖啡，因此會揀Pineapple Ginger Soda畀佢哋，反正佢哋都鍾意黃色嘢咁話喎。
193親自示範手沖咖啡
負責精品咖啡嘅Ringo介紹時，提到想做一款甜感較高嘅咖啡，因此House Blend選用本地烘焙、混合洪都拉斯同衣索比亞咖啡豆，偏Fruity風味，就算係平時比較少飲精品咖啡都會覺得易入口。
手沖咖啡（$88起）
一般Espresso Based咖啡同手沖咖啡之外，亦會有切合日式風格嘅抹茶同焙茶飲品。193更特別推介玻璃樽裝嘅Super Rich Cocoa（$68），話飲嘅時候可能會飲到一粒粒朱古力，皆因佢哋唔係好似一般Cafe咁用粉沖調，而係真係用一粒粒朱古力煮出嚟。
挪威Brunost芝士Croffle（$98）
食物方面，193提到佢哋參考咗唔少日本同韓國嘅Cafe，留意到好多韓國妹豬打卡都有影到一款Brunost Cheese Croffle，好奇一搵先發現香港得一間小店有供應呢款挪威傳統Brown Cheese。試過覺得好味之後試過唔同食材嘅組合，最後選擇配搭自家打發嘅忌廉，甜甜哋又夠香。而且佢哋係香港暫時唯一一間Cafe有供應Brunost Cheese Croffle呀。
抹茶紅豆Croffle配雪糕（$88）
柚子蜂蜜Croffle配雪糕（$88）
Croffle另外兩款口味各有特色，抹茶紅豆配搭有和風感，抹茶雪糕加上抹茶醬雙重茶香，配埋煙韌麻糬口感豐富。柚子蜂蜜就酸甜清爽，柚子嘅黃色亦襯返Cafe主題色。
照燒牛肉Egg Drop（$88）
另一主打輕食係Egg Drop吐司，Adam提到好多時候男仔去Cafe想Chill下，同時亦想食嘢醫肚，所以就決定供應Egg Drop。麵包係搵本地烘焙品牌幫佢哋製作，希望做到外脆內軟嘅口感。
小龍蝦沙律Egg Drop（$98）、經典Egg Drop（$85）
Egg Drop配料亦會不定期更新，Adam預告之後會提供更多有唔同地方特色，又或者係Fusion風格嘅口味。相反想食Light啲或者方便Grab & Go，亦有知名本地烘焙嘅英式鬆餅68同Bagel選擇，後者更有抹茶麻糬同芋泥兩款特色口味選擇。
Tanuki Coffee（暫定4月10日開張）
地址：土瓜灣馬頭圍道63號啟岸18號地舖（崇志街與庇利街交界內街入）
文：Cathy.H
相、片：Wilfred Chui