第10位 芝心糖人街
呢間餐廳已經連續兩個月打入十強喇，睇嚟香港真係有好多芝士控。上個月就同大家介紹過下呢度嘅芝士系食品，嗰啲咩芝心蛋白流心吐司呀、芝士魚蛋呀咁，去試咗未先？今次就唔重複講啲芝士喇，講下榴槤。係呀，呢間餐廳除咗食芝士，其實佢真身係一間甜品舖。而其中一款甜品就係乜乜脆脆。咁芒果脆脆就食得多啦，但呢度仲有榴槤脆脆揀呀！鍾意食榴槤嘅朋友，佢嘅榴槤脆脆係外脆內軟、外熱內冷㗎！脆皮包住嘅係榴槤肉同cream，好重口味，但鍾意嘅就會好鍾意。
圖：ronronyip、bageladdiction睇個名就知呢間café以喵星人做主題啦，唔知啲嘢食上碟會畫隻喵落去，餐廳裡面仲真係有幾隻貓㗎，等緊嘢食嗰陣又可以同貓貓玩，食緊嘢嗰陣又得，食完嘢再玩都得，啱晒一眾愛貓嘅朋友。不過為咗衛生，入餐廳前就要除鞋，但一定要著襪，有心去嘅朋友留意返。
餐廳有意粉有小食都有甜食，鍾意食芝士同流心蛋嘅，見到餐牌上面嘅芝士流心蛋吐司應該即刻冇晒抵抗力，件吐司中間空心，放咗隻流心雞蛋同熱熔芝士，仲夾埋火腿片同洋蔥粒，包皮脆包身軟，新鮮熱辣辣烘焗完就快啲食喇，相機食完先就凍晒㗎喇。
圖：wanttoeat、chanhocho2125第8位 味帝漢堡（*新上榜）
大角咀真係有好多好嘢食，呢間第8位嘅漢堡店又係位於大角咀。行fusion路線嘅味帝漢堡，最吸引當然係雙層芝士碎蛋煙肉牛肉漢堡，淨睇個名咁長就知有幾多料啦，話就話雙層芝士，但當所有料疊埋晒一齊嘅時候，係有七、八層咁高㗎！碎蛋、自家醃製手打牛肉、半溶芝士、煙肉、再嚟多層自家醃製手打牛肉、仲有厚切蕃茄同生菜，一頭一尾夾返塊搽咗牛油嘅包，完勝！
另外仲有個海南雞飯堡都係必須嚐試嘅，佢將海南雞飯同漢堡融合，底面兩層用剪香嘅脆飯焦做包，中間嘅餡就係滑捋捋嘅雞肉同埋青瓜絲，食落真係食得到海南雞風味㗎。
圖：奶叔、hkfoodtalk第7位 Bien Bistro
呢間餐廳行多國菜路線，泰國、西班牙、匈牙利、新奧爾良、澳洲等國嘅菜都有得食，幾個朋友叫幾款菜，唔使去旅行都可以一次過食晒唔同國家嘅特色菜式。焗梨約克群布甸即係焗梨肉布甸，可以食到一粒粒嘅果肉，再加多球雪糕，呢啲咪享受囉。另一款都幾得意嘅甜品係澳洲鮮草苺蛋白酥餅，塊酥餅好鬆化，脆得嚟但又入口即溶咁，連埋士多啤梨醬食，酸酸甜甜，口感幾特別。
圖：piggy16、長情小公主第6位 七福神和食亭（*新上榜）
想食日本嘢唔一定要放題嘅，搵間日式料理一樣得。呢間餐廳用料新鮮，叫個刺身拼盤仲跟有半板海膽，三文魚等刺身又肥美，絕對係大滿足。但如果你嚟開呢間餐廳食，記得要留肚最後食埋個甜品，生果雪芭，啲生果係原個上㗎！有菠蘿、椰子、蘋果等味揀，啲雪芭就掏空咗個生果之後再放入去，所以生果味好突出㗎！
圖：ombill、bonbon妮第5位 芭堤雅小廚（*新上榜）
平時入開大尾督通常都係踩單車同BBQ，但原來呢度隱藏咗一間正宗泰國餐廳。食泰國菜必飲冬蔭功湯是常識吧。呢度嘅冬蔭功，淨係睇煲湯嘅色水鮮橙到一個點，就知有幾足料，酸酸辣辣，重點係有成隻原隻大蝦浸喺個湯入面，鮮味十足。而餐廳嘅照燒珍寶大頭蝦亦係另一道唔能夠錯過嘅菜式，話明珍寶蝦，隻蝦當然有返咁上下巨型，蝦頭仲有好多膏添呀，蝦身肉質又鮮又甜又彈牙！
圖：Joanna H 第4位 米走雞
雖然最凍嘅日子已經過咗（好似係），但係香港人對於食雞煲依然都係咁熱衷，仲要係芝士雞煲添，就更加唔受季節嘅限制啦，一年四季都要食，所以米走雞又喺十強榜出現，一啲都唔出奇。
先食返個芝士雞煲，喺芝士湯底同芝士粒混合底下而製嘅雞肉當然芝士味特濃，唔好嘥咗個湯底，叫埋個公仔麵食返轉芝士撈丁，然後再好似打邊爐咁食牛呀丸呀菜呀咁，全部餸都係芝士芝士同芝士，芝士迷表示興奮！
圖：CutePoPoLoK、Foodie Buddies第3位 熊拉麵（*新上榜）
做人最緊要有得揀，食嘢都係！熊拉麵最開心嘅地方就係可以自己揀自己碗拉麵係點樣合成。由麵嘅粗幼度以至硬度，仲有加咩配料咩size通通都可以自己揀！黑熊拉麵就係用黑蒜做湯底，成碗麵都黑麻麻但係香噴噴，幼身麵比較有彈性而粗身麵就口感較重，另外叉燒冇乜肥膏，脂肪少，食多幾件都唔怕肥。不過，想食嘅就真係要趁早，事關豚骨湯底係經過12個鐘長時間熬製，淨係得150碗㗎咋每日，限量供應賣晒就冇。
圖：mmnwilliam、cynthiaaameow第2位 山脈流川（*新上榜）
觀塘工廈café往往都能夠帶嚟驚喜，今次呢間山脈流川都唔例外。餐廳設有露天座位，仲有個賣好多懷舊零食嘅小賣店，好有情懷。但要數呢度嘅特色，一定係佢嘅朱古力系列飲品，全部都會清楚咁列明每杯嘅成分，例如金莎朱古力，就係30%碎金莎加20%朱古力再加50%牛奶，所以飲落有香濃嘅金莎朱古力味之餘仲好幼滑，幼滑得嚟又會咬得到一粒粒嘅金莎碎，重點之中嘅重點係有粒真‧金莎喺杯頂㗎！如果你叫繽紛樂朱古力都會有粒繽紛樂係頂。
除咗飲品，主食一樣咁有特色，好似呢碟青bb嘅意粉，係忌廉蘑菇菠菜煙三文魚意粉，平時食黑麻麻嘅墨魚汁麵就食得多，用菠菜汁嚟整嘅意粉就唔係成日見到嘞，食落好鬼fresh。
圖：IE食神俠侶、師母第1位 Seoulmate Café
榮登2月榜首嘅係呢間由韓國人喺西環開設嘅韓式café，最吸精嘅首先要數大熱食品，紫著嘅製品。呢度有紫薯年糕吐司、紫薯蛋糕，仲有紫薯latte，絕對可以食紫薯全餐呀！杯紫薯latte飲落仲有啲紫薯粒粒添呀，但就唔會話好甜，凍熱有兩種唔同口感。
而熱食嘅就有個岩漿蛋拌飯配黑松露煙三文魚介紹返，又係玩層層疊嘅遊戲，一層飯夾住一層配菜，頂頭放上黑松露煙三文魚，加埋「內置」嘅岩漿蛋同秘製韓式辣醬，好鬼澎湃，又好鬼開胃。韓風得嚟又包含晒香港人最愛嘅元素，唔怪得冇得輸啦。
圖：eat_eat_everyday、mush_room文：Marcus/Kar
隨時接收最新資訊
讚好OpenRice專頁！
關鍵字
排行榜
紫薯
拉麵
芝士
cafe
複製到剪貼簿