2016亞洲50最佳餐廳香港九間餐廳上榜

2016年亦即係第四屆亞洲50最佳餐廳，喺2月29號曼谷嘅頒獎典禮上正式公佈完整名單。今次50最佳餐廳裡面總共有九間香港嘅餐廳上榜，排名有升有跌，其中一間上升兩級之餘仲重奪中國最佳餐廳殊榮！

第4位　　Amber

今年排名上升兩級，而且擊敗上海餐廳Ultraviolet成功重奪中國最佳餐廳殊榮！Amber呢間高級法國菜餐廳從米芝蓮二星肯定到再次成為中國最佳餐廳，廚藝總監Richard Ekkebus當然功不可沒，所有菜式都集創意、精緻同美味於一身。

第10位　　龍景軒

今年重登十大之列嘅龍景軒已經係多次上榜，亦係第一間獲得米芝蓮三星殊榮嘅中菜廳。以新派粵菜為主，用料講究，中式Fine Dining之選。

第13位　　8½ Otto e Mezzo BOMBANA

知名意大利菜餐廳，比起舊年跌咗五位。唔少食家都對佢地嘅白松露意粉讚不絕口，全因主廚Bombana唔單止曾經喺2006年擔任白松露嘅代言人，而且素有白松露之王嘅美譽。

第27位　　大班樓

又一星級粵菜餐廳，所有菜式都認真製作，招牌作雞油花雕蒜花蟹同羊肚菌炆腐皮等手功菜可見一斑。菜單上有懷舊粵菜亦有新式中菜，令食客每次去都有新驚喜。

第33位　　天空龍吟日本料理

日本傳統懷石料理店，從食材選擇、每道菜搭配次序到清酒嘅選擇比其他日本菜都更為精緻考究，優質食材係每日從日本空運到港，而且根據季節變化。餐廳位於101樓，更有「飛龍在天」嘅感覺。

第34位　　福臨門

有「名人飯堂」之稱嘅中菜館，唔少傳統新鮮廣東點心都係推介，用料講究而且水準穩定。而到晚市，蜜汁叉燒、蛋黃八寶鴨、大紅片皮乳豬等都係招牌菜。

第40位　　L'Atelier de Joël Robuchon

雖然喺2016年米芝蓮當中維持三星評級，但喺2016亞洲50最佳餐廳名單上面就跌咗23名。呢間食法國菜嘅Fine Dining餐廳用料名貴擺盤精緻，走新派路線，半開放式廚房餐廳配搭簡約裝修。

第41位　　廚魔

廚魔Bo Innovation嘅廚魔指嘅係大廚梁經倫，佢將分子料理融入中菜當中，比食客一種全新嘅美食體驗。例如餐包睇落似雞蛋仔，咬落就似蔥油餅，創意十足。

第48位　　Ta Vie

由天空龍吟日本料理嘅創辦總廚山本征治先生徒弟佐藤秀明主理嘅呢間法日Fusion高級餐廳，成為香港今年唯一新上榜。餐廳旨在帶食客進行一次味覺之旅，餐牌亦會定期更換，確保新鮮感。

按此瀏覽2016「亞洲50最佳餐廳」完整名單

隨時接收最新資訊
讚好OpenRice專頁！