4大卷蛋推介小山圓抹茶x靜岡焙茶、日本蜜柑卷蛋口味

鬆軟嘅蛋糕配埋香濃幼滑嘅奶油，再加上有咁多唔同嘅口味，難怪咁多人都抵擋唔住卷蛋嘅魅力喇～今期介紹幾間有賣特色卷蛋嘅店舖畀大家，除咗有手工卷蛋專門店，仲有啲咖啡店推出唔同口味，如七彩蜂蜜卷蛋、日本蜜柑、開心果同蜜瓜口味等，甜品控要準備bookmark喇！

手工卷蛋專門店 Happy Roller

人氣卷蛋網店，兩年前已經開埋實體店喇！店舖係傳統麵包老店開心餅店嘅副線，由餅店第二代主理，由傳統西餅撈到去日式甜品都一樣掂～呢度最招牌一定係各式茶類口味，如丸久小山圓抹茶x靜岡焙茶生乳卷蛋，丸久小山圓抹茶忌廉味道會回甘，香氣仲會喺口腔留好耐，而靜岡焙茶忌廉茶香突出同帶甜，兩隻味唔會互搶而係互相輝映，好出色。

圖: sleepbeauty

七彩蜂蜜卷蛋 ABC餅屋

灣仔老字號麵包店，卷蛋都係佢哋嘅人氣之選～當中蜂蜜卷蛋最特別，因為可以一件就有晒唔同口味，包括紫薯、綠茶、咖啡同朱古力，切面睇落好似花朵咁，啱晒鍾意打卡或者有選擇困難症嘅朋友。而且卷蛋本身夠鬆軟，加埋幼滑香濃嘅忌廉食好滿足呀。紫薯卷蛋都推介，將紫薯打成細粒狀再加入忌廉，甜味好自然。

圖: Oh My Food Bae

日本蜜柑口味 Heima Heima

位於長洲嘅北歐風cafe，碼頭行過去大約15-20分鐘，環境簡潔舒適，啱晒想搵個地方chill下嘅朋友。佢哋主打唔同嘅甜品，招牌日本蜜柑卷蛋，卷蛋本身好鬆軟，蛋味香濃，包裹住原粒蜜柑，奶油只有薄薄一層，甜味主要來自蜜柑本身，好清新！海鹽焦糖咖啡卷蛋都好值得食，咖啡味濃郁而不澀，中間嘅兩粒咖啡凍又增添口感。另外仲有蜜糖無花果紅茶卷蛋，簡直係卷蛋控天堂！

圖: tiffsuet