秋冬係栗子當造季節，一齊睇吓香港有咩栗子甜品食，連因電視節目黑白大廚而爆紅嘅栗子Tiramisu香港都有呀～
爆紅栗子提拉米蘇 Tic Tac Room 
唔講唔知，原來而家香港都可以食到電視節目《黑白大廚》裡面爆紅嘅栗子Tiramisu！呢款「栗子提拉米蘇」絕對係今季甜品界嘅話題之作，選用法國栗子蓉、絲滑澳洲忌廉芝士加上焦糖咖啡層層疊起，帶嚟醇厚柔滑嘅口感；中間夾層加入消化餅增添層次感，入口即化，仲有淡淡嘅甜味，一啖接一啖都唔會膩。最上層再刨上細膩牛奶朱古力絲同栗子粒，口感豐富之餘仲帶陣陣香氣，完美復刻節目冠軍主廚嘅招牌甜品！
法式純素栗子千層酥 The Cakery
呢間餅店繼續堅持健康甜品嘅理念，推出咗一系列全新栗子口味嘅純素甜點，畀大家無負擔咁享受秋日精緻甜品！最值得試就係佢哋嘅法式純素栗子千層酥，用上法國栗子蓉同澳洲忌廉芝士，層層疊出香濃細膩嘅口感，仲有鬆脆嘅酥皮包裹住，食落軟綿綿；上面仲鋪滿栗子粒同金箔裝飾，更貼心地提供迷你版揀𠻹～另外仲有栗子戚風蛋糕同栗子杯子蛋糕，前者鬆軟輕盈香氣十足；後者用純素香草杯子蛋糕做底，中間係豐富嘅栗子忌廉，頂部再鋪上順滑嘅栗子蓉，每一啖都帶出濃郁嘅栗子香。
抹茶栗子蒙布朗雪糕 鍋點
圖：mickhl
日本淺草人氣甜品店茶々工房進駐咗呢間餐廳，亦都帶埋招牌甜品生榨抹茶栗子蒙布朗嚟！呢款甜品係用鬆脆嘅華夫筒盛載住，層層疊加北海道紅豆蓉、抹茶黑糖漿、抹茶海綿蛋糕等豐富材料，口感多變。最特別嘅係以靜岡縣抹茶同法國栗子製成嘅生榨蒙布朗忌廉糊，香氣四溢，抹茶同栗子完美結合，散發出自然嘅風味。內餡更加入天然檸檬果醬同新鮮檸檬皮，幫助平衡甜味，食落唔會覺得太膩。
奶油栗子蓉朱古力戚風蛋糕 牧羊少年與他的浮萍
圖：蛋糕選用香濃嘅栗子蓉同奶油製成，栗子香氣濃郁，戚風蛋糕鬆軟輕盈，每一啖都充滿層次。佢嘅奶油唔會膩，香滑之餘帶有自然甜味，栗子蓉亦唔會過甜，令栗子本身嘅香氣自然散發，配搭濃郁朱古力，帶出更深層嘅口感；栗子粒甘甜，奶油栗子蓉則口感綿滑，入口即溶，令人回味無窮。頂層裝飾用咗糖漬栗子同栗子蓉，成個甜品賣相精緻又吸引。
文：Yanica
編：Cathy
