焙茶簡單啲嚟講，即係烘焙過嘅日本煎茶，帶有烘焙嘅香氣，茶嘅苦澀味都會少啲～今次搵咗幾間好味嘅焙茶甜品畀大家，茶類甜品控要bookmark啦！
焙茶黃豆粉忌廉冰 Shari Shari Kakigori House 氷屋
圖：鍾意食甜品嘅一定對呢間人氣冰店唔陌生，開咗幾間分店仍然人氣不減！佢哋嘅雪花冰係用特別技術製作，質感輕盈，每一啖都好幼細綿密，好似食緊雪糕咁，口味幾多選擇，亦會不定時推出限定口味。其中焙茶黃豆粉忌廉冰加上超濃焙茶醬、忌廉同黃豆粉蕨餅，焙茶味啱啱好，同黃豆粉好夾，忌廉同蕨餅又令味道同口感更有層次。
香濃焙茶卷蛋+焙茶芭菲 京林屋
圖：於日本京都宇治擁有多年歷史嘅抹茶老字號，主打一系列抹茶同焙茶甜品。焙茶卷蛋蛋糕體好鬆軟，帶有淡淡焙茶清香，入面嘅焙茶奶油就好香濃，但唔太甜，配埋焙茶雪糕同紅豆丸子食無得輸呀。另外仲有多款焙茶甜品，包括煙煙韌韌嘅黑糖珍珠焙茶雪糕、特濃焙茶雪山、焙茶芭菲同焙茶芝士蛋糕等，焙茶fans必食！
焙茶麻糬窩夫 Ukiyo 
圖：文青風cafe，採用大落地玻璃窗、淺木為主嘅裝修同植物擺設，感覺非常舒適。焙茶麻糬窩夫大大塊鮮奶麻糬放喺窩夫上面，非常吸睛！窩夫以日本焙茶製作，口感鬆軟帶焙茶清香，外脆內軟；麻糬則用上3.6牛乳、日本麵粉等做成，煙韌Q彈，同豆腐雪糕一齊食更清新。另外焙茶鮮奶都值得一試，同時有焙茶香同奶香。
焙茶富士山 Pancake 專門 
圖：位於銅鑼灣，主打無麩質日式班戟嘅專門店，焙茶富士山面層係400次焙茶奶蓋，口感順滑稠身，奶味香濃，整體微甜帶淡淡茶香。焙茶雪山pancake都好有特色，外層蛋白有用火槍燒過，裡面係原味pancake同雲呢拿雪糕，焙茶味濃，外脆內軟，好有新鮮感。
文：Yanica
編：Cathy
