蒸氣火鍋通常都以海鮮為主打，皆因咁先食到最原汁原味嘅海鮮！今期介紹4間人氣蒸氣鍋畀大家，有全新嘅日系風格、太子人氣抵食店、海鮮蒸鍋放題及火炭小店，睇下邊間啱你食～

目錄

日式木系蒸氣鍋 虎嘯日式蒸氣專門店

蒸氣火鍋選擇就有好多，但日系風真係好少有呀！呢間新開嘅日式蒸氣火鍋自設魚缸養殖多款時令海產，保證食材新鮮。推介海鮮蒸氣刺身套餐，套餐包括餐前小食、龍蝦、刺身、北海道扇貝、鮮鮑魚、醬油花螺、牛肉福袋、海蝦、一夜干石持魚、墨魚滑、宮崎縣生蠔、日式芝士烏冬、新鮮野菜盛合及甜品，最後仲會將所有嘅海鮮精華整成日式雜炊，食完原味後逐一加入紫菜、柚子胡椒、明太子、麵豉，盡吸鍋底海鮮精華，好鮮甜。期間限定長腳蟹套餐都好值得試，不過溫提要早一日訂同4人以上先可享用呀。

$258龍蝦套餐 鍋心八鮮蒸鍋

圖: lovedining2016

鍾意食海鮮嘅朋友一定對呢間人氣蒸鍋唔陌生～好食之餘咁多年都仲保持住良心價，難怪咁受歡迎啦。呢度嘅海鮮蒸鍋以套餐形式供應，暫時有3款海鮮套餐，好似龍蝦套餐都係$258，包括足料燉湯、2款主海鮮龍蝦同白蜆、自選6款時令海鮮及肉類如鮑魚、海蝦、蟶子、蠔、元貝及蟲草花蒸滑雞等，仲有八寶蒸飯都好出色，自選8種材料，味道有啲似煲仔飯咁好香～最後當然唔少得自家製燉甜品！

海鮮蒸鍋放題 壹蒸鍋

圖: ctt35

啱晒大胃王嘅海鮮蒸鍋放題，包一次蒸海鮮，多款蒸品同火鍋配料任食～海鮮嘅質素唔錯，包括鮑魚、蟶子、海中蝦、白鱔、扇貝及蜆等。食完海鮮就可以試下唔同嘅蒸品，如辣酒蒸花螺、蒸魚雲、XO醬蒸牛柏葉及小籠包等，都幾有特色。最後當然可以用埋個鮮味滿滿嘅湯底打邊爐啦！

火炭高質素小店 Drink氣鍋 

圖: Nikki_kk

一間位於火炭嘅高質蒸鍋小店，佢哋都係供應海鮮套餐為主，但同坊間唔同嘅係佢哋會供應埋特色啲嘅蒸品，如XO墨魚滑冬菇、蒸黑豚雞髀菇蘆筍卷及杞子圓肉蟲草花蒸鮮雞，款款都真材實料㗎。海鮮方面必試上湯芝士蒸青花龍蝦，香濃又惹味；溫室野菌蒸花尾躉都鮮味滿滿，最後當然要食埋粥底，用咗日本十六穀煮成，米香特別重。

文：Yanica