一出爐就陣陣牛油香，外皮呈金黃色，入口香脆內裡濕潤，配埋奶油同果醬食真係無得輸！鍾意食糕餅嘅朋友一睇就知係形容緊Scone喇！英式鬆餅係英國下午茶文化最具代表性嘅甜品，不過除咗下午茶，而家有好多餅店同咖啡店都有得食喇，以下呢5間你試勻晒未先？
酒店級英式鬆餅 The Butterfly Room
講到scone相信唔少人都聽過呢間酒店嘅大名～佢哋嘅下午茶出名難book，唔少人都專程為佢個英式鬆餅而去，鬆餅有原味同提子口味，外層脆身，一入口就好鬆化同濕潤。配上clotted cream、士多啤梨果醬同柑橘醬，果醬都幾高質，仲食到粒粒果肉，而且唔會太甜。
圖: Konkon22
超過50款口味網店 Jackson's scone
人氣急升嘅Scone網店，最巴閉係佢有成50款口味，有排試啊！招牌之作係紅棗味，使用自家製紅棗醬，甜味自然帶陣陣紅棗香。另外香蕉花生醬、三重美祿恐龍麻糬、桂花酒釀丸子、脆皮菠蘿油同奶醬多味都好有特色。店舖堅持選用澳洲麵粉、西班牙雞蛋等食材，製作時亦使用忌廉代替部分鮮奶，難怪每次開團都咁快滿額，想食要留意返佢哋IG呀。
圖: 官方Facebook
自家製忌廉及無花果醬 Loft & Scone
又一網店轉戰實體店嘅成功例子，必試招牌Scone Set，鬆餅選用日本雞蛋及北海道麵粉製作，帶淡淡麵粉香嘅同時仲咬到小麥顆粒。另外因為店主覺得scone配clotted cream太heavy，所以呢度嘅scone係配自家製馬斯卡彭忌廉同無花果醬，馬斯卡彭忌廉有奶香而口感輕盈，無花果醬則帶有粒粒果籽，清甜唔膩。溫馨一提Scone每日限量100件～
圖: Konkon22
伯爵茶scone 一草一木
身為伯爵茶控，一定要試試呢度嘅scone！人氣伯爵茶scone嘅茶味恰到好處，一入口會先感受到淡淡伯爵茶香，然後慢慢食到本身嘅牛油香，兩者嘅平衡做得唔錯，就算加埋clotted cream或jam都唔會蓋過scone本身嘅味道。而且口感都做到外脆內軟，絕對係出色嘅scone！
圖: 鹹香惹味scone 14 SOUTH LANE
Scone唔一定要食甜嘅～西環呢間主打素食嘅咖啡店個Broccoli Rocket Cheddar Scone好令人驚喜，鬆餅做到外面鬆脆內裡有濕潤度，味道上帶有芝士鹹香，配埋酸酸辣辣嘅tomato chutney sauce好惹味開胃，好有新鮮感。
圖: MakEmily4184、holidaymood2020
文: Yanica