旺角有火鍋店慶祝開業一周年優惠，推出3款任食火鍋放題，價錢由$88至$108不等，湯底亦設好幾款選擇，咁抵食梗係要即刻睇睇啦！

介紹番，3款任食火鍋均包括：前菜、42款火鍋配料、甜品及飲品，湯底都有4款選擇。不同嘅係$88只包任食雞肉，$98任食豚肉、雞肉，而$108則牛肉、豚肉及雞肉3種。百零蚊就包晒3款肉及其他食物，識食嘅當然識揀！

湯底提供4款選擇：秘傳月見壽喜燒湯鍋、香濃豬骨湯（左）、香茜皮蛋湯（右）及北海道昆布湯。香濃豬骨湯都幾足料，有一大件豬骨上鍋，仲有黑白芝麻添加味道。

開飯仔推介秘傳月見壽喜燒湯鍋，帶點甜味嘅壽喜燒湯，令肉類口感更豐富，尤其是牛肉、豚肉。而且，餐廳跟送一人一隻雞蛋，用來蘸各款配料。

先來一道前菜沙律，有胡麻、柚子兩款選擇，前者胡麻味香濃，後者酸甜醒胃。

牛肉（左）油花明顯較多，味道充滿油香；而豚肉（右）脂肪不多，食落都幾有嚼頭。兩款肉類都切得薄薄哋，唔使淥好耐，淥幾秒就食得。

上碟嘅全部都係無骨雞肉，肉質鮮嫩之餘仲好吸湯。

各式火鍋配料，有墨汁花枝丸、牛肉丸、芝心丸、特長蟹柳、豚肉腸、豚肉湯包、響鈴等等。

蔬菜方面有西洋菜、油麥菜、鮮淮山、粟米、蓮藕片、冬菇、金菇等。

至於甜品都有6-7款，除咗有不同口味嘅雪糕雪條之外，仲有少許自家製甜品如桂花糕、藍莓芝士蛋糕及tiramisu。

價錢仲包埋任飲，10幾款罐頭飲品，好多選擇。

每位跟送口感彈牙嘅越南虎蝦兩隻，正！

怕火鍋唔夠食？唔緊要，餐廳更提供額外升級，加$68可任食三文魚、劍魚腩、赤魚、北寄貝、魷魚、甜蝦、赤貝及希靈魚8款刺身。

想食餐廳招牌花膠雞湯嘅話，加$98就可以食到啦！

同場加映！5款新款吸睛湯底

除咗任食火鍋，餐廳同時推出5款新湯底，齋睇各款湯底嘅湯色就已經甚有特色，分別為：松茸花膠竹絲雞湯、五蔬美人鍋、壯腰強身牛尾湯、蘋果雪耳雞湯以及藥膳四川麻辣雞煲。5款湯底各有功效，有養顏有去濕有寧神有潤膚有潤肺，客人可以喺火鍋之前飲番碗，品嚐一下心機湯先。

升級版嘅松茸花膠竹絲雞湯，比起餐廳嘅招牌花膠雞湯更加高質。廚師選用比起一般雞隻更有營養嘅竹絲雞，再加入花膠、姬松茸一同熬煮而成。

湯色偏淺綠嘅五蔬美人鍋，聞起來亦幾有「草青」感。湯底係集合西芹、青椒、青瓜、粟米及苦瓜5款蔬菜搾汁而成。單單湯底都好fresh，淥牛肉、淥豚肉嘅時候就可以減輕油分。

蘋果雪耳湯同樣可減輕肉類嘅油膩感，但味道比較滋潤啲，湯底主要配料有蘋果、雪耳、雞肉、雞湯等。

呢個湯色雖然好似番茄湯，但其實係壯腰強身牛尾湯，入面有牛尾、甘筍及紅腰豆，味道好有牛尾嘅膠質，感覺好養顏。

OpenRice會員於星期日至四訂座可享時段優惠，2-3位可享全單減$100，優惠券在此

開業一周年優惠任食火鍋放題
供應日期：2018年3月15日至5月31日
供應時間：星期日至四晚上7:30pm前離座、晚上8:45pm後入座
價錢：$88-$108/位，另設醬油費（$15/位）及加一服務費。
注：必須預先訂座；星期五及六使用優惠須每位另加$28；優惠要兩位或以上客人方可使用

鍋匠中日火鍋專門店
地址：旺角彌敦道613號飛達商業中心1樓

文：Joy