嚟到9月份，十強榜繼續反映港人愛打卡嘅習慣，有多間打卡店入圍。另外亦有兩間健康poke bowl餐廳上榜，睇嚟都巿人愈嚟愈注重健康呢。
第10位 The Pizza Pig（*新上榜）
圖：位於將軍澳嘅呢間餐廳，人氣唔錯。餐廳以藍白色為主調，採半開放式設計，日頭夠晒光猛。叫得The Pizza Pig當然以pizza做主打，嚟到記得試，但建議多啲人一齊去會開心啲，因為佢哋有個30吋，成張枱咁長嘅巨型pizza，好鬼震撼。pizza以石爐烤焗而成，餅底鬆脆。
第9位 Hunky Dory（*新上榜）
圖：有唔少朋友放假都鍾意去下科學園，呢度有間都靚靚餐廳，有埋空中花園，都幾受歡迎。好多人去到都鍾意食返個牛油果雞肉漢堡，健康又好食嘛。另外推介亦可試試韓式烤牛肉泡菜班尼迪克蛋，呢個配搭係幾有趣，有新鮮感，估唔到又幾夾喎。
第8位 Deer Kitchen（*新上榜） 
圖：好多受歡迎嘅餐廳，都一定會有啲打卡位。呢間都唔例外，有兩個以雀籠為主題嘅卡位，係好多客人都想坐嘅位置，有幸坐到記得要影多幾張相。嚟到除咗可以鋸下扒、食下意粉外，推介可試特色焗威靈頓三文魚。外皮酥脆，三文魚扒厚墩墩，肉質嫩滑。
訂座優惠：$10一隻新鮮生蠔
第7位 PokéToké
圖：foodxgoodwest_hk、foodmapdidi
個個都注重健康，poke bowl成為咗近年深受歡迎嘅食品。呢間主打poke bowl嘅餐廳已經第二次上榜啦。有6款官配選擇，亦可以自選食材配搭，三文魚同牛油都係熱門之選呢。不過呢度都係有邪惡食品供應嘅，包咗薯條、炸蝦、炸魚柳等嘅炸物拼盤真心唔錯，好易令人抵唔住誘惑咯科科。
第6位 Pier 1929（*新上榜）
圖：花花走廊加埋維港海景，呢度可以堪稱為打卡聖地，有唔少女生都慕名過嚟食tea打卡呢。當然，佢哋嘅tea set亦做得好有心思，加咗好多花花做配襯呢。另外推介白酒蟹味噌忌廉蟹肉意粉同西班牙慢煮乳豬，前者淡淡酒香，後者以75度慢煮而成，皮脆肉嫩重有肉汁𠻹。
第5位 Poke Go（*新上榜） 
圖：十強榜內另一間poke bowl店。呢間就有5款官方配搭組合，另外亦可任由客人自行配搭。客人可以喺三文魚、吞拿魚、八爪魚或雜菌香菇中揀一款做main，再配搭沙律菜、壽司飯或珍珠糙米，重有多款配料同醬料揀，當中最特別嘅可以話係山葵乳酪醬，嗆嗆地咁幾過癮。
第4位 牡蠣小屋
圖：hasafoodiehubby、vanessafoodiary
咁多人鍾意食生蠔，呢間由日本人開設同主理嘅蠔屋又咁多牡蠣菜式選擇，要再次上榜完全冇難度。蠔迷基本上都係衝住鐵盒燒生蠔而去朝聖，枱枱都點。將清酒加入燒盒後再燒，燒過嘅生蠔特別香口，鮮甜中更帶有海水鹹香。另外亦有供應牡蠔豬肉、燒牡蠣飯糰、牡蠣茶漬飯等，啖啖蠔香。
第3位 Wingman（*新上榜） 
圖：ivyrabbitholic、foodieleaf_hk
呢間雞翼專門店一向好受歡迎，中環店已經上過2次榜，今次終於輪到旺角店。慢煮後再炸香嘅雞翼，雞皮特別脆口，肉質就仍然可以保留喺嫩滑狀態，重好多汁𠻹。嚟到最開心係有雞翼放題，口味有成18款選擇咁多，係開心仔嘅。推介花雕醉雞翼、巴馬臣芝士蒜蓉味、泰式甜辣醬同水牛城醬口味。
第2位 J.Moon（*新上榜）
圖：一上榜就進佔第2位嘅呢間餐廳，環境氣氛係最殺食嘅。以月球為主題，懸掛住160盞月球波波燈，又靚又浪漫。而呢度最特別嘅一定係佢哋以十二星座為主題嘅雞尾酒，例如「摩羯座」會加入朱古力同奶油調製。食物方面則有多款fusion菜式供應，當中又以拉得絲嘅J.moon pizza為特別推介。
第1位 為食火鍋公司（*新上榜）
圖：9月榜首位置係屬於以哥基為主題嘅雞煲火鍋店，集港人兩大飛佛元素，兼夾任食放題，只要食材新鮮、款式選擇多，當然就容易取得大眾歡心。雞煲加入秘製醬處理，更推介加入豬皮、牛柏葉同魷魚呢三寶，係幾惹味。食完雞煲打邊爐，重有海鮮拼盤，包括扇貝、鮑魚、桶蠔等，絕對係滿足嘅一餐。
文：Kar