睇返9月嘅十強，都係以小店、café為主，無論食物款式定口味都幾多元化，有港式亦有南洋風味等，但少有地竟然冇日式餐廳上榜。
第10位 Butlery（*新上榜）
圖：沙田成日畀人話唔夠多美食，今次十強終於有間餐廳上榜，為沙田爭返啖氣。呢間café係區內人氣餐廳，成日都排長龍架。去到無論主菜食juicy安格斯牛肉burger又好、定係冬蔭公fusion意大利飯都好，記得要留肚食甜品——梳乎厘pancake真係重點。抹茶、伯爵茶味都有濃濃茶香，pancake鬆軟，推介。
第9位 吃扒（*新上榜）
圖：復古主題嘅餐廳，成個環境、播歌、裝飾全部都好60年代舊香港嘅氛圍，無論想去懷舊一下定係去打個卡都好啱。餐廳主打各款鐵板扒餐，推介特選肉眼扒配薯條，塊扒好大塊又有肉汁，仲要有熱溶芝士畀你淋上去，視覺效果一流。
第8位 Owens（*新上榜） 
圖：行文青風嘅café通常都深得大眾歡迎，呢間近日喺IG大熱嘅餐廳都唔例外，登上十強榜內。而且難得地唔係淨係食環境，連嘢食都又抵又好食。紅酒汁燴牛胸腹肉意大利飯都幾多人嗌，牛胸腹肉腍嫩，味道濃香，risotto又索晒牛汁精華。甜品要選麻糬抹茶蛋卷，口感鬆軟、麻糬軟糯。
第7位 馬來椰爺（*新上榜） 
圖：南洋風味小店，手工醬料都係自家炒製，湯底以新鮮食材同天然香料製作，濃味但絕對唔係味精味，難怪大受歡迎。湯底主要有6款選擇，並配搭唔同食材，推介虎蝦帆立貝配叻沙摻摻湯底，湯底鮮香，海鮮新鮮爽甜。另外可試鮮牛油班蘭椰香手工咖央多士，好香口。
第6位 辛手村
圖：呢間特色川菜餐廳連續2個月打入十強，實力得到肯定。佢哋主打干鍋以及串燒，仲有日式壽喜燒。鍾意松露嘅朋友仔，可以試試估你唔到麻辣黑松露干鍋，兩樣重口味嘅嘢夾埋一齊都冇話撞到嘭嘭聲，各有發揮。啲配料既有辣香，又吸收埋松露香，係幾惹味。
第5位 GRIND SIZE
圖：兩層高嘅純白色café，大大隻字寫住見字飲啡，仲有梳化同塌塌米位置，全部都係打卡嘅設定。食物方面同樣啱打卡，龍蝦蝦蝦多士勁澎湃，啲炒蛋同龍蝦肉疊到高一高，幾乎見唔到塊多士。另外，蟹膏三文魚子、帶子、明太子手捲粉亦係人氣美食之一，手捲粉掛汁煙韌，撈埋蟹膏、三文魚子一齊食，啖啖鮮味。
第4位 Awesomeism CAVE（*新上榜）
圖：以銀、黑色為主調嘅餐廳，裝潢型格，Menu配搭創新。好似雞翼咁，平時唔係蜜糖味就係水牛城咁，呢度居然加埋花生醬落去，變咗花生醬鹹蛋黃單骨雞翼，先唔講單骨有幾方便，兩款口味原來幾夾，鹹鹹香香。冬蔭公烤粟米又係得意之作，酸酸甜甜仲要辣辣地。嚟到好多枱都會叫埋自家製嘅scone，牛油味香、口感鬆軟，值得一試。
第3位 南本草（*新上榜）
圖：長沙灣主打養生料理，並將涼茶元素加入食物中嘅呢間餐廳，得到第3位。健康得嚟又有得打卡，nice。推介一下「日簡五品」，包括咗主菜、2款配菜、玉子燒同飯團，拼埋一齊影相幾靚。其中，養生腐皮福袋烏冬幾特別，福袋入面收埋咗啲烏冬，仲有蟲草花同杞子，味道清甜。
第2位 叁不館
圖：以古式茶檔同電影為主題嘅港式火鍋店，再度上榜。牛魔王唔可以錯過佢哋多款特別嘅牛肉部位，例如手切封門柳、安格斯牛頸脊等，份量都幾多下，包滿足。平時打邊爐鍾意食響鈴嘅朋友仔，要試呢度嘅紫菜炸響鈴，新鮮炸，脆卜卜。要爽就要點莫生氣椰椰雞湯湯底，可以拎住成個椰青倒啲椰青水落個煲度！
第1位 魚事者（*新上榜）
圖：旺角係街頭小食必爭之地，呢間新開冇耐嘅小食店，極速上位，登上榜首。佢哋本店喺炮台山，分店開喺旺角自然更就腳。全店以魚肉製成小食為主，好似炸魚扮薯條、魚肉麵等等都係熱門之選，仲有芫荽控大愛嘅無豬肉芫荽燒賣，即係芫荽魚肉燒賣，荽味十足！
文：Kar
