Little Twin Stars Fans注意！灣仔呢間水產市場繼之前Hello Kitty櫻花祭，同蠟筆小新暑假限定店之後，今次舉辦Little Twin Stars秋之祭呀！當然唔少得主題美食，好似賣相超可愛嘅壽司盛，同Via Tokyo抹茶軟雪糕等等，食飽再去影相打卡，得咗。
Little Twin Stars 茗荷涼拌豆腐（$68）
築地‧山貴水產市場即日起至11月22號舉辦秋之祭，主打六款主題美食，唔少都相當有秋天Feel。好似呢份茗荷涼拌豆腐，唔單止上面印住秋日Little Twin Stars圖案，仲用咗日本料理秋季常用，有「亞洲人參」美譽嘅茗荷。
Little Twin Stars 金箔海膽手卷（$138）
而嚟到水產市場，主角當然唔可以少咗新鮮海產啦。呢份手卷嘅主角就係海膽，仲用其他食材整成流星，最後加上金箔裝飾。另一個重點係紫菜上面印住可愛嘅Little Twin Stars圖案，不過大家影相最好盡量快手啲，如果唔係紫菜變腍就口感就扣分啦。
Little Twin Stars 壽司盛（$198）
壽司都可以賣萌！呢份壽司盛上面Kiki同Lala其實分別係玉子飯糰同腐皮飯糰，最驚喜嘅係用魚子同蘿蔔等點綴嘅蛋被下面，係六件手握壽司！
壽司分別係三文魚、帶子、吞拿魚背、左口魚裙邊、油甘魚同平目魚。
（左）Kiki 馬卡龍宇治抹茶雪糕、（右）Lala 馬卡龍北海道 3.6 牛奶雪糕（各$88）
抹茶甜品店Via Tokyo最近喺呢個水產市場開咗期間限定店，所以今次亦有以佢地招牌抹茶、北海道 3.6 牛奶軟雪糕為主嘅甜品！兩款都分別加上印住Kiki同Lala圖案嘅馬卡龍，仲有白玉、蕨餅等配料，非常豐富。
更多【飲食潮流】： |
Little Twin Stars 抹茶蛋糕卷（$68）
抹茶控另一必試，抹茶蛋糕卷從日本直送，上面以印上金色Little Twin Stars圖案嘅朱古力牌做裝飾，記得要相機食先呀。
（左）Little Twin Stars 秋日特飲（$98）、（右）Little Twin Stars 雞尾酒
飲品同樣以秋日為主，秋日特飲用益力多同咸檸檬調配，味道酸中帶鹹。而雞尾酒更加選用自家製嘅和歌山梅酒，梅香濃郁容易入口。
Little Twin Stars 專屬玻璃酒杯
兩款飲品都會送上 Little Twin Stars杯墊同杯盒，皆因呢個Little Twin Stars 專屬玻璃酒杯喺享用完飲品後可以直接帶走！Fans記得唔好走寶呀。
築地山貴 x Little Twin Stars秋之祭主題商品
水產市場唔少地方亦有Little Twin Stars 秋之祭主題裝飾，最搶眼嘅一定係2.4米高嘅立體Little Twin Stars 秋日場景，一定要影返幾張合照先得。而三款主題商品：日式便當袋、造型陶瓷醬油碟套裝同香薰石套裝都係限量發售，想入手嘅Fans唔好太遲去買啦。
築地‧山貴水產市場 x Little Twin Stars 秋之祭
日期：即日起至 2018 年 11 月 22 日
地址：灣仔灣仔碼頭2樓
文：Cathy
相、片：Tom Li