聖誕節就到喇，當然要同親朋好友食聖誕大餐飲下酒啦！當唔同嘅酒即使配上相同嘅食物都會有截然不同嘅味道，繼上次20週年活動後，OpenRice今次繼續同Prime House Whisky Lounge舉辦威士忌美食搭配工作坊，透過威士忌同不同食物嘅搭配，一齊揾出邊個組合先係最夾！
Prime House Whisky Lounge每個月都會定期舉辦威士忌大使證書課程及唔同嘅酒類活動，等大眾可以深入認識威士忌更多。而今次活動同樣有駐場英國威士忌大使Alvin為大家講解威士忌知識及如何品嚐威士忌，仲帶咗幾款同Whisky最夾嘅食物畀大家品嚐，令大家體驗到威士忌配搭不同食物嘅變化。
活動中唔少會員都好踴躍。如Kitty及Tat，佢哋係第一次參與OpenRice活動，成個過程都好享受，而且因為Kitty之前喺外國讀書，佢認為呢類品酒活動喺外國好平常，但喺香港就好少有，所以能夠喺香港參與到呢類型活動都好enjoy。
另一對會員Eva及Matthew就認為埸地選擇唔錯，Matthew平時有飲開酒，所以接受到活動中品嚐較烈嘅威士忌，而且對威士忌嘅認識又多咗。
地址: 觀塘創業街15號 萬泰利廣場11樓 G 室