相信大家平時趕返工實冇時間慢慢嘆個早餐，又或者咬個麵包就當一餐。不過去到週末，就梗係唔好虐待自己啦！計開飯仔話，一個有Planning嘅人梗係把握假期去休息吓，食個靚brunch、叉足電，然後......先有氣力繼續「扮工」㗎嘛～ 
 

驚喜西班牙fusion海鮮Brunch    Supergiant Tapas & Cocktail 

位於銅鑼灣一間酒店內嘅呢間西班牙餐廳，最近推出fusion版嘅brunch，200零蚊有齊前菜、小食同甜品再包多杯西班牙氣泡白酒，抵呢~ 淨係前菜已經帶嚟驚喜，傳統西班牙麵包配鮮磨蕃茄相當清新開胃，主菜選擇有肉眼扒又有海鮮，想再享受多啲，加錢嘆埋意大利黑魚子醬配帕尼尼餅啦，鹹鮮味超香！餐牌仲會不定期更新，就算去多一兩次都唔怕悶。

Supergiant周末尋味早午餐
價錢：每位$268起，包一杯Cava Pere Ventra Primer Brut Reserva氣泡白酒
供應日期：即日起逢星期六、日 （11:30-15:00）

呢間主打100%純種伊比利亞火腿嘅專門店最近推出Brunch，Tapas、火腿、Pinchos呢啲賣相夠晒Colourful嘅西班牙傳統前菜係走唔甩嘅。仲有一系列嘅龍蝦主題菜式，包括波士頓龍蝦西班牙飯：粒粒米都吸收晒用龍蝦頭熬成嘅濃湯同埋其他海鮮嘅鮮甜味，隻龍蝦仲啖啖肉𠻹！

夏日全新周末龍蝦半自助餐
價錢：$398/位
供應日期：逢星期六及日 （12:00-16:00）
 

餐廳喺大館入面，古蹟環境同呢個Brunch嘅主題都幾夾！因為銀車烤肉係英式餐飲傳統嚟。銀車由專人推到餐桌旁侍餐同即席分菜。今次嘅Brunch仲有傳統英倫菜式——「英式烤牛肉配約克郡布甸」，入面有鵝脂烤薯仔，同酥脆鬆軟嘅約克郡布甸。同坊間少見嘅英式甜品——「拖肥布甸配奶油糖醬汁和濃縮忌廉」，扮自己去咗英國一轉都得，嘻嘻。

Britannia Brunch早午餐
價錢：$628/位 （包無限量供應Veuve Clicquot香檳）
供應日期：逢周末及公眾假期（12:00-15:00）
 

餐廳內大部分座位都面向維港，可以邊食邊欣賞靚景。呢度嘅Brunch除咗有經典代表嘅班尼迪蛋外，仲有即叫即開嘅生蠔同生蠔香檳杯，當然唔少得「海量」嘅海鮮：波士頓龍蝦、蟹腳、龍蝦鉗、青口等等。唔止海鮮選擇多，就連熱盤同甜品都多嘢揀，一家大細都啱食！想試吓廚師手勢嘅話梗係叫返份香煎鴨肝多士配果醬啦！

KITCHEN經典週日自助早午餐
價錢：成人$898/位 ，小童（4-11歲）$488/位（包括無限添飲Veuve Clicquot Yellow Label香檳、餐酒、啤酒、雞尾酒）
供應日期：逢周日（12:00-15:00）
 

位於半島酒店二十八樓嘅Felix同樣亦欣賞到維港美景，餐廳主打新派歐陸美食。呢度嘅brunch分咗好幾個區：冰鎮海鮮區、有班尼迪蛋嘅雞蛋美食區、芝士區、誘人甜品區，仲有即叫即製嘅歐陸主菜，就連Vegan同Gluten Free嘅嘢食都有！不過最特別嘅係呢度有現場樂隊音樂演奏，咁嘅環境加埋樂隊演奏先至係Chill嘅極致㗎嘛。

Felix周日早午餐
價錢：$ 898 /位，小童（六歲或以上）＄638 /位 （另外收加一服務費）
供應日期：逢星期日（11:30-15:00）