喺香港主打正宗美式煙燻燒烤嘅餐廳唔多，最近喺中環終於搵到間，特別從美國訂製一部正宗柴火煙燻爐，主打以傳統低溫慢煮嘅方法烤出肉嫩多汁嘅正宗風味！一系列烤肉最啱各位食肉獸呀。
 

Smoke & Barrel位於中環雲咸街，以傳統美國德薩斯州風味燒烤作賣點，搵嚟三位美國同墨西哥大廚坐陣，更從密蘇里州訂造名為「The Beast」嘅柴火煙燻爐，同一般炭爐或者天燃氣烤爐唔一樣嘅係，餐廳選用荔枝木，可以保持一個穩定嘅溫度，咁就可以用低溫慢煮嘅方式，以大量柴火燻出鮮美烤肉。
 

Crab Salad（$118）

適合分享嘅前菜當中有呢份蟹肉沙律，新鮮蔬菜配搭彈牙蟹肉、厚切煙肉同Smoke & Barrel特色醬汁，喺輕盈清爽當中加入煙燻香氣，惹味開胃。
 

All-American Brisket（$108/100g、$208/200g、$308/300g），Seasonal Smoke & Barrel Sausage（$108）

餐廳所有烤肉都用「The Beast」柴火煙燻爐烤製，美式腩肉嘅煙燻味道比較明顯，加上牛脂香氣，加倍誘人。而香腸就會按時令更換唔同款式，呢期嘅墨西哥辣肉腸鹹香突出夠香口。
 

Cider Glazed Baby Back Ribs（$148/半條，$368/條）

呢份烤豬肋骨喺烤肉過程中加入蘋果酒，令肉質更嫩滑，烤出嚟亦的確做到骨肉分離、肉嫩多汁！而豬肋骨嘅焦香加上酸甜嘅燒烤汁真係會令人食上癮呀。
 

 

Jalapeno Cornbread （$68）

烤肉主菜仲可以配搭唔同配菜，好似呢份墨西哥辣椒粟米麵包當中就加入墨西哥辣椒，微辣開胃，味道以粟米甜香為主，濕潤鬆軟。
 

Mississippi Mud Pie（$88）

最後當然唔少得一份甜品，密西西比甜批嘅朱古力香味濃郁，加上酸甜清新嘅蔓越莓醬同橙肉平衡，甜而不膩。
 

（左）Daisy Dukes（$88），（右）Smoke & Barrel’s Sour（$88）

酒吧方面主打經典美式雞尾酒及原創招牌雞尾酒，後者包括呢兩杯推介。Daisy Dukes以杜松子酒、桃、香豆調配而成，Smoke & Barrel’s Sour則加入煙燻8個鐘嘅香橙。
 

Smoke & Barrel
地址：中環雲咸街30-32號雲咸大廈1-2樓

文、相：Cathy