蛇王祖萍記豆品小食

營業中

休息中

今日下午我們喺粉嶺聯和墟食完豬手麵之後，行過聯安街見到有間食蛇羹嘅「蛇王祖萍記豆品小食」都幾多人食，所以我們就入咗去食返碗蛇羹！我們叫咗個抵食套餐：大五蛇羹拼臘味糯米飯！大五蛇羹嘅蛇肉份量都幾多，湯底嘅味道亦好鮮味，而且濃稠度亦調教得恰到好處，唔會過稠或過稀，再加埋啲檸檬葉一齊食，簡直係絕配呀！臘味糯米飯嘅糯米非常煙韌軟熟，唔會過腍或過硬，而臘腸除咗舖滿嗰幾片之外，仲有切成粒裝之後撈入糯米飯入面，令到臘腸嘅油香味完全滲透晒啲糯米飯度，所以味道真係相當芳香惹味！原片芒果賓仔糯米糍係即時喺現場整，每次整完一批之後都好快賣晒，我們都要等第二批先有得食，一嚟到嗰陣我們就覺得好特別同好吸引，因賣相係一個有一隻手掌咁大嘅鵝蛋形咁，咬開一半就見到入面原來係原片厚厚鮮黃色嘅芒果肉，感覺真係超抵食呀，而且味道非常香甜，而且外層嘅糯米皮極之薄身，質感相當煙韌軟滑，真係超正呀！石磨芝麻糊係用人手石磨，所以超級香滑濃郁，有極之芳香嘅芝麻香味，真係真材實料呀！

剛剛食完群記，有d心思思想食甜品。醒起群記附近有間賣糯米糍嘅鋪頭，決定買件食下～蛇王祖萍記豆品小食係一間集多種食物嘅食店，除左蛇、我今日想食嘅原片芒果賓仔糯米糍之外，亦有豆腐花、奶凍及中式糖水紅/綠豆沙可供選擇。通常我都係買原片芒果賓仔糯米糍外賣拎返屋企食。但一陣我約左男朋友睇戲，所以買完直接喺鋪頭附近立食！每一次食佢都冇令我失望，原片芒果夠厚夠大塊，而且都係已熟透嘅芒果，啖啖都係最香甜嘅果肉。另外，外層包裹嘅糯米糍皮亦做得夠薄！可惜我本身有濕疹，芒果係濕毒之物，食太多會濕疹發作，都係間唔中淺嚐過下口癮就算～