點心到 (廟街)

營業中

休息中

晚餐時段都有得食點心真係好正，今次就去咗佐敦嘅點心到，貪呢度地點就腳、選擇多又足料！黑松露菜苗餃（$27）爽脆鮮甜嘅蝦膠蔬菜餡，加上鋪面嘅黑松露醬，營養均衡又美味可口！沙律明蝦角（$28）炸到金黃香脆嘅蝦角，蘸埋沙律醬，香口滋味。紅油抄手（$25）有五至六粒抄手，煮到啱啱好，皮唔會過腍，辣油加蔥增加風味！醬皇金錢肚（$25）微辣惹味，口感軟腍，以白蘿蔔墊底，非常入味！欖仁馬拉糕（$20）逐啖撕開少少食，睇到又感受到糕身嘅蓬鬆同彈性，入口香甜鬆軟，淡淡欖仁香！濃湯杞子浸時蔬（$20）杞子濃雞湯飲落幾清甜養生，簡單調味已經足夠，菜心非常爽脆！

留意這間點心店好耐，終於開番堂食，就去試下。雖已三點幾，但客人不斷。座位算闊落，阿姐們也快手有禮。叫了幾樣點心，全部新鮮出籠，百分百香港製造，味道適中不過鹹，滿意。第一次試，叫的點心比較保守，它還有些較新潮的點心和甜點，下次再試。原隻蝦燒賣2粒（$15）蝦和豬肉都爽口彈牙。蜜汁叉燒包（$25）包皮鬆軟不痴牙，叉燒無肥膏，醬汁不會一擗擗。如果叉燒切得大粒些會更好，現在較碎。黑金流沙包（$25）賣相靚仔，包皮鬆軟，流沙夠香。香茜牛肉腸（$24）腸粉夠滑，牛肉足料夠厚，不過作為芫荽控的我不滿芫荽太少。鮑螺片滑雞粥（$26）粥底雖略淡，但是我喜歡的較稀粥底，加番分。雞肉大件醃得入味，份量又多；鮑螺片香濃煙韌。豐料糯米雞（$28）汁濃肉鮮，唔錯唔錯。濃湯杞子浸時蔬（$18）正常。

黎佐敦揾FD，睇到哩間鋪頭食點心好似唔錯，咁試試。今日揀咗晶瑩鮮蝦餃，懷舊鵪鶉蛋燒麥，燒汁釀虎皮椒，紅油抄手，濃湯鮮竹卷，豉椒蒸排骨同濃湯杞子浸時蔬。點心喺即叫即蒸嘅，所以都要等耐少少。蝦餃可以叫2隻或者3隻，我地兩個人，當然叫2隻啦，咁可以試多幾款點心。蝦餃皮好薄，蝦好大一隻，食落好彈牙好鮮甜，同埋冇雪味，唔錯。燒汁釀虎皮椒煎得啱啱好，食落好香口。裡面啲鯪魚肉餡好彈牙，配啲醬汁有少少酸味，好夾。不過辣椒都有少少辣，我食就啱啱好，FD食就覺得辣咗D。紅油抄手好大一份，大大件抄手仲有5件，配上香醋同辣油一起食超好味。宜家出面好少可以食到鵪鶉蛋燒麥，可能哩件嘢整落都幾麻煩。鵪鶉蛋蒸得啱啱好，唔會太熟，食落入口即化，同燒賣都幾夾。豉椒蒸排骨都幾大一份，排骨有差唔多10件，排骨蒸得好幼滑，同埋好重蒜味。底下芋頭嗦哂醬汁，好粉好惹味，完全唔夠喉。濃湯鮮竹卷湯底好鮮甜，鮮枝竹嗦哂湯汁鮮甜味，每一啖都好滿足。菜心整得啱啱好，食落好脆，菜心加咗少少調味已經好夠味，唔需要太重調味cover咗D鮮甜味。最後買單唔哂加一，食到超飽都唔夠150HKD，勁抵LOL!

呢間點心專門店晚市都有得飲茶，仲有幾款店家特製點心，價錢算親民，茶芥$3一位。而且點心即叫即蒸，全部熱辣辣～正！卡通流心芋蓉包 $22 賣相幾Cute，食落餡唔算多但幾好味。晶瑩鮮蝦餃 $15/2粒，幾大隻，皮夠薄，唔錯。黑松露菜苗餃 $25 賣相都唔錯，但食落唔覺有松露味，而且皮比較煙韌，有點失望。原隻蝦燒賣 $15/2粒，幾大粒，口感唔錯。懷舊鵪鶉蛋燒賣 $24 普普通通無特別。燒汁釀虎皮椒 $22 青椒辣度有後勁，慢慢滲出黎，正！金沙脆皮銀蘿腸 $25 有驚喜，首先條菜有薑汁味，之後腸粉皮夠滑，餡脆中有蘿蔔絲，口感好豐富。推介！濃湯杞子浸時蔬 $18 嫩菜清甜，剪開一半方便夾，個湯都飲埋。

故名思義，餐廳「點心到」是一間點心專門店。從開飯網知悉餐廳屬新店之一，難怪裝潢仍感光猛新淨。相比酒家隨便三四十元一客點心，「點心到」的點心價格相對相宜，平均約二十元一客左右。茶錢每位只需三元，更不用加一。整體而言，各款點心普遍水準持平，難言出眾。小編比較喜歡的點心有甜重辣輕挺惹味的「紅油抄手」；外觀可愛餡料特別的「卡通流心芋蓉包」；以及酸香軟糯的「椰絲香芒卷」。「晶瑩鮮蝦餃」與「黑松露菜苗餃」皮厚味淡。「豉汁蒸鳳爪」同樣醃煮得不夠入味。「點心到」以相對相宜的點心定價取勝，水準難言出眾，性價比合理。