老爹

營業中

休息中

年初四午餐 街上無乜人無乜店有開見到daddys kitchen有開就上左去得知原來初三已經開！附近居民都有得食下可能時間尚早無咩人 場地十分闊落 有落地玻璃望下街 感覺都幾chill食物不過不失 肉質唔錯 就算叫7成都唔會太韌👍🏻份量夠多 有湯有包有主菜有餐飲 餐飲方面竟然有珍奶！性價比高但眼見只得三位侍應 忙起上黎真係會唔夠人 見好多食評都話侍應服務態度差 掉三落四 但將心比心 唔夠人情況下 經過每張枱都俾人追單 明明唔關自己事都被鬧 都幾無辜 我亦體諒唔夠人「冧住做」嘅情況 希望他日再來會見到多d員工令到好評如潮啦！加油💪🏻 祝生意興隆

之前行開上環，見到商場樓下有個易拉架寫住daddy's kitchen，心諗下次要帶daddy過嚟食下先得，今日終於帶埋daddy一齊過嚟試下。餐廳都好闊落，牆身用左紅磚牆，有少少英倫風。除咗有西餐食之外，亦都有烏冬同拉麵，仲有精選全日套餐，都好優惠，好抵食。 不過爸爸話想食西餐，所以最後都係揀咗食扒。套餐方面有餐湯同蒜蓉包， 餐湯方面就揀咗一個羅宋湯，同埋一個忌廉湯，佢嘅忌廉湯唔係一般忌廉湯咁簡單，而係菠菜蓉湯， 個湯唔會太稀或者太傑，質地啱啱好。 羅宋湯酸度適中，菜蔬材料豐富， 蕃茄味濃。 蒜蓉包夠曬香脆，蒜蓉味好香。首先黎個頭盤-白酒煮藍青口，份量好足夠，青口隻隻新鮮肥美，散發住陣陣白酒香味，唔會有海水味，仲有蒜蓉包伴碟。主菜方面，爸爸揀左個歐陸式雜扒，非常之豐富，有大大塊牛扒、雞扒同豬扒， 肉質嫩滑， 加埋燒汁， 味道更加豐富，仲有條司華力腸添。至於我自己就揀左個紐西蘭肉眼扒，味道甘香，油脂分佈平均，肉眼扒份量足夠，薯角金黃香脆，烤焗嘅時間掌握得非常好。跟餐免費有一杯飲品， 可以揀珍珠奶茶、金桔檸檬、蜂蜜綠茶、檸檬茶、咖啡。我就揀左杯蜂蜜綠茶，味道不錯。如果加$5仲可以轉特飲