和藏桂林夜市 (已結業)

下午茶時間見口痕痕，食完飯冇耐，冇理由又食飯架？最好緊係篤串嘢食，奈何香港篤串嘢食嚟嚟去去都係魚蛋燒賣煎釀三寶，內臟魯味我又唔多好，咁究竟我仲有冇第二個選擇呢？當經過呢間和藏桂林夜市就出現喇。佢就係避風塘豆腐！懷住（香港總於有香港人嘅手信喇）嘅感覺，膽粗粗咁叫咗兩件，原本以為佢攞起手跟住落啲避風塘配料就算，點知佢即炸喎！我當堂打咗個突，心諗：咁有誠意？等咗一分鐘度就炸好，味道配合得非常好，少少辣，加啲豆瓣醬直情一流。而豆腐本身有口感，配合鍾意食清嘅我，簡直一絕。價錢亦叫做中規中矩啦。下次經過要試下水準能唔能夠保持先得。

今日難得放一日假去完旺角行街之後有啲肚餓 咁就梗係要去登打士街一帶掃街啦～之前聽到好多報道都講呢一間桂林夜市好正咁就今次就終於試喇  唔通佢啲嘢食全部都真係好似台灣嘅夜市咁樣?! 第一樣要試嘅當然係佢嘅功夫魷魚絲啦我呢就叫咗一條因為想留肚試埋其他野呀嘛睇住姐姐首先燒香塊魷魚之後呢就再擺落個部機度搞啊搞 過左一陣一條長長嘅魷魚絲就出嚟啦 再加埋醬汁食 正呀～除咗魷魚我仲試咗避風塘豆腐($12/2件) 豆腐炸得好香口我好鍾意佢嗰陣辣辣蒜香味! 當中要講一講嘅係佢嗰個特製醬汁! 嗰個醬呢呢酸酸地又辣辣地 混埋脆脆地嘅椒鹽豆腐黎食 成件事好夾好惹味!

呢日放工行過油麻地，諗住掃街食小小野先再行街，行下行下，見到間小食檔好似係新開嘅，咁就諗住試下啦！行埋去個陣，鋪頭前面有兩位靚靚auntie 超熱情，好熱情咁介紹佢地嘅招牌魷魚絲啊豆腐啊，我被佢嘅熱情感染到，咁就决定試下佢d招牌野啦！我叫左佢地嘅招牌秘制魷魚絲，靚auntie 即叫即做，用呢個特製烤網將新鮮魷魚用火熗烤乾。Auntie  真係好似打功夫咁，起曬勁咁用部機拉呀拉，將條烤好嘅魷魚絲拉到超長。成套太極拳降龍十八掌打完之後，條魷魚絲就拉到咁長😝好勁呀！一路睇住auntie  打功夫咁拉佢，一路等住食，都幾開心我叫左辣，所以auntie  就係上面落左佢地嘅秘制辣醬功夫魷魚絲（$28），好好味，勁香魷魚味，有咬勁有火侯$12兩件嘅避風塘豆腐，呢個真係好食到炸！我見佢地會不斷出新嘅豆腐出黎，一出爐就敲鐘，吸引周圍行緊嘅人過黎望幫襯，咁樣每個人食到嘅都會係食鮮炸起，好正呀！岩岩炸起嘅豆腐，食落個外層炸到索索聲，入面豆腐超超超軟，真正嘅外脆內軟啊！佢個汁都好正，唔辣但微微地酸，岩岩好平衡番炸野嘅油膩感，呢個豆腐真係正到我要encore  幾次囉！