【銅鑼灣高CP值西班牙菜】推介脆卜卜烤乳豬．自家西班牙油條

喺銅鑼灣想搵間旺中帶靜又高質嘅餐廳好好享受下美食，最近就多咗「SABROSA」呢個好選擇。餐廳主打正宗西班牙菜，大量選用嚟自西班牙或意大利供應商嘅上乘食材，糅合傳統西班牙烹調技術同創意，配搭各款色彩繽紛嘅Cocktail，適合情侶或者同親朋好友一齊大快朵頤。

餐廳裝修時尚，加上可以觀賞銅鑼灣鬧市街景嘅大玻璃窗，非常舒適

口感豐富Tapas　香燒帶子配珍珠麵

講到西班牙菜唔少人都會諗起Tapas，當中比較特別嘅有呢款「香燒北海道帶子配珍珠麵」，珍珠麵係意大利薩丁尼亞島嘅經典麵食，以杜蘭小麥粉製成，用檸檬、百里香等煮過，味道清新又有一粒粒嘅口感。北海道帶子肉質鮮嫩，碟邊更有日式牛蒡漬物，解膩開胃。

香燒北海道帶子配珍珠麵

超甘香！48個月伊比利亞黑毛豬

特別挑選100%純橡果餵飼嘅伊比利亞黑毛豬，更係較少見嘅風乾48個月，油花適中而且其獨特甘香濃郁，比起坊間常見嘅風乾32個月或者24個月嚟得更油潤唔死鹹。而鮮茄蓉西班牙脆包就用咗特別多汁鮮甜嘅新鮮牛茄配搭西班牙水晶包(Crystal Bread)，酸酸甜甜加上番茄清香，可以平衡返黑毛豬火腿油膩感。

西班牙橡果風乾48個月黑毛豬火腿片及鮮茄蓉西班牙脆包

即席煙燻　黑松露生牛肉片

打開玻璃蓋即有白煙飄出，皆因呢份生牛肉片會由廚師自家以蘋果木煙燻，保留更多香氣。生牛肉片則選用西班牙安格斯牛柳，肉質柔嫩而且咬落唔會有筋。加上當季黑松露片同香草檸檬沙律油，前者增添獨特芳香並提升味道層次，後者清新令味道平衡。

自家製煙燻生牛肉片，混合香草配黑松露檸檬沙律油

皮脆肉嫩　傳統西班牙烤乳豬

私心推介大家必試嘅心機菜，呢道「傳統西班牙烤乳豬」要先將乳豬慢煮18小時令肉質放鬆，拆骨後再烤，做足咁多步驟就可以令乳豬瘦肉鬆化、肥膏甘香、豬皮更加係又薄又脆到好似食緊薯片咁！想減低油膩感可以配白蘭地嘅慢煮蘋果蓉，想濃味啲就配利酒烤豬汁。

傳統西班牙烤乳豬

啖啖鮮味！西班牙紅蝦海膽飯

西班牙菜當中又點少得Paella，「西班牙紅蝦海膽飯」嘅主角絕對係用藏紅花、海膽汁同龍蝦海鮮汁煮成嘅飯底！每啖飯都吸滿鮮味精華，上面再加橙色嘅自家製海膽汁同黃色嘅藏紅花蛋黃醬，分開食又得，撈埋一齊食就味道更豐富、口感亦會更Creamy。新鮮西班牙紅蝦煎至約7成熟，肉質爽甜鮮美，仲有香濃甘香嘅蝦膏！

西班牙紅蝦海膽飯

經典意大利風味　卡邦尼意粉

意大利卡邦尼意粉最正宗嘅做法，原來同大家經常接觸嘅版本好唔同！首先係要用意大利煙燻豬頸肉，煎脆後有濃郁嘅油脂甘香。然後以煎完煙燻豬頸肉得出嘅豬油，加酒、同日本雞蛋煮意粉，令每條意粉都沾上油香同蛋黃香，最後灑上Parmesan Cheese，將濃郁風味再提升至另一層次。意粉亦選用意大利頂級品牌Pasta Mancini，麵質特別彈牙。