夏天特別想食酸酸辣辣嘅泰國嘢啊!! 如果咁啱去開PMQ仲可以試埋入面間“BKK”。呢度主打曼谷、泰國東北部料理，外籍大廚用多種香料結合甜、酸、辣、鹹，特別係泰式辣椒膏炒沙白粉絲湯辣得嚟勁有層次!!
仲有大隻脆卜卜嘅炸辣味雞翼；抑或酸辣兼又脆又嫩嘅炸原條紅鯛魚配青芒果絲都好吸引，同平時食開嘅泰國嘢好唔同。
【必食推介】
泰式辣椒膏炒沙白 配免治雞肉粉絲湯
泰式辣椒膏一向有種辣中帶甜嘅層次，濃稠質地仲好掛湯，所以呢道粉絲每啖都好香濃啊。
同埋佢嘅辣好有後勁，就算隔咗十幾秒都有種辣喺條脷度湧上嚟。有種越食越上癮嘅感覺好爽，而且沙白份量都多同鮮甜。
炸原條紅鯛魚 配青芒果絲
如果你平時食泰國菜都會嗌條烤魚，呢道炸原條紅鯛魚真係必食!! 好少見泰菜用石斑科嘅鯛魚，魚皮特別Q彈厚，炸完好酥脆啊。伴碟嘅青芒果絲都堆到好滿，清爽輕辣夾埋魚肉一齊食勁豐富。
炸辣味雞翼
上菜嗰陣，大廚提到呢碟炸辣味雞翼係佢嘅至愛。咬第一啖就知佢點解咁講啦，因為雞皮超脆，雞肉又好肥美爆汁。泰式辣椒辣得快而香口，加埋滿滿炸蒜好衝撃。
炭燒生蠔
“BKK”有炭爐燒生蠔，蠔肉唔算好巨，勝在厚肉多汁兼帶炭香。淋上嘅自家製酸汁，酸中帶鹹幾濃郁；加埋生蠔卜開爆汁口感，勁滿足。
香辣炒手切和牛碎
濃味控一定要試埋呢個和牛碎!! 和牛肉碎存在感好強，大大粒有咬口，仲會越咬越鹹香。大廚加咗九層塔、辣椒、香蒜，香草層次會慢慢滲出嚟，無論單食或配飯/配烤餅都好吸引。
【人氣小食】
烤餅配泰式紅咖喱
泰國菜點少得烤餅+咖喱～但又想留肚食多啲嘢嘅話，可以揀呢個咖喱小食，滿足到烤餅癮又唔會太飽。而且烤餅勁鬆軟又有牛油香，一定要趁熱食啊。
蝦餅配蝦沙律
私心最愛炸蝦餅～自家製蝦餅好厚身多肉，口感好彈牙!!
烤粟米
就咁食蝦餅驚熱氣，推薦叫多個烤粟米平衡吓，仲會跟配自家製咖喱醬，清爽得嚟一啲都唔單調㗎。
【大滿足甜品】
“BKK”有幾款甜品揀，最吸睛一定係芒果椰汁糯米飯椰子新地，好似芭菲杯咁放滿椰子雪糕、芒果肉，食到中間仲會舀到煙煙韌韌嘅糯米飯，如果行完PMQ想坐低食個甜品都好值得啊。
當然仲有經典泰式椰汁糕，口感綿密，輕甜帶椰子風味，鍾意佢嘅甜度啱啱好。
BKK
地址: 中環鴨巴甸街35號PMQ元創方A座Staunton地下SG09-SG14號舖
電話: 23300306
Facebook: https://rb.gy/kuaqjz
Instagrma: Bkk HK (@bkk_thaistreetfood)